Boluntarioak behar dituzte bihar Bermeoko portua auzolanean garbitzeko
Bermeoko Izaro Sub urpeko taldearen ekimenez egingo da auzolana, eta portua azalean kostaldean eta itsaspeko hondoan garbituko dute. Herritarrak sentsibilizatu nahi dituzteBermeoko portua garbitzeko auzolana egingo dute bihar, eta lan horiek aurrera er...
Bermeoko Izaro Sub urpeko taldearen ekimenez egingo da auzolana, eta portua azalean kostaldean eta itsaspeko hondoan garbituko dute. Herritarrak sentsibilizatu nahi dituzte
Bermeoko portua garbitzeko auzolana egingo dute bihar, eta lan horiek aurrera eramateko boluntarioak behar dituztela adierazi dute. Bermeoko Izaro Sub urpeko taldeak antolatu du auzolana, eta portua azalean kostaldean eta itsaspeko hondoan garbituko dute.Horrela, bi helburu betetzea bilatzen dute: alde batetik, portuko itsas hondakinak garbitu eta baztertu nahi dituzte, eta bestetik, herritarrak arazo larri horretaz ohartarazi, sentsibilizazio kanpaina modura.
09:00etan hasiko dira garbiketa lanak egiten, Bermeoko Portuan bertan. Laguntzera doazen boluntarioek, garbitzeaz gain, hainbat jarduera egiteko aukera edukiko dute: umeek beraiei zuzendutako jokoez gozatu ahalko dute, eta adin guztiei zuzendutako material didaktikoa ere egongo da. Ez hori bakarrik, boluntarioek auzolanean parte hartu ondoren, indarrak berreskuratzeko mokadu bat dastatzeko aukera izango dute, eta gainera, kamiseten eta hainbat ezustekoren zozketak egingo dituzte.
Garbiketa lan horiek Libera Proiektuaren 1 m2 por la naturaleza izeneko jardueraren baitan daude, SEO/Birdlifek Ecoembesekin bultzatutakoa. Kostako 23 leku ezberdinetan aldi berean egingo den itsaspeko hondoen garbiketa izango da.
Bermeoko Izaro Sub urpeko taldeak ekimena antolatzeko hainbat erakunde eta elkarteren laguntza izan du: besteak beste, aipatutako SEO/Birdlife eta Ecoembes, Bermeoko Udala, EKP, Bilboko Portuak, Olatu.net, Ur Riders, Surfrider, Campos, MB 2000 edota Bermeo Print.
Ez da halako auzolana Bermeon egiten duten lehenengo aldia. Antolatzaileek gogoratu dutenez, joan den azaroan ere antzeko garbiketa lanak egin zituzten Bermeoko Portuan. 35 boluntario aritu ziren auzolanean, eta zabor kilo asko batu zituzten, giro politean. Hortaz, emaitza «oso positiboa» izan zela nabarmendu dute. Auzolan horien garrantzia ikusita, Izaro Subeko kideek herritar guztiak animatu dituzte parte hartzera, ingurumena «zaintzeko eta aldi berean ondo pasatzeko aukera paregabea» izango baita zapatuan, Bermeoko portuan.
Izaro Sub taldeagaz kontaktuan jarri nahi dutenek izarosub@izarosub.com helbidera idatzi edota 687 40 04 27 telefonora deitu ahalko dute.
