2037 Memoriaren Mapa proiektua aurkeztu dute Lobek
Urte bukaerarako amaitu nahi dute proiektua. Mapa egiteko 3.250 euro behar dituzte, eta hori lortzeko 40 eguneko diru bilketa jarri zuten barikuan martxanGernikako bonbardaketa eta herriko garapenaren memoria bilduko duen mapa interaktiboaren proiektua...
Urte bukaerarako amaitu nahi dute proiektua. Mapa egiteko 3.250 euro behar dituzte, eta hori lortzeko 40 eguneko diru bilketa jarri zuten barikuan martxan
Gernikako bonbardaketa eta herriko garapenaren memoria bilduko duen mapa interaktiboaren proiektua aurkeztu zuten Gernikako Lobek Elai-Alai aretoan, barikuan. Memoria eta Gernika-Lumoko espazio publikoa lantzen duen proiektua da 2037 Memoriaren Mapa deitutakoa. Barikuan hasita, proiektua burutzeko beharrezkoa den diru bilketa egiten dabiltza; 40 egunekoa izango da, eta 3.250 eurotara iristea du helburu.Proiektua urte bukaerarako prest izatea nahi dutela azpimarratu zuten arduradunek barikuan: «Denbora luzean hausnartu eta garatu den proiektua abendurako bukatuta izatea espero eta nahi dugu».
Azken urte eta erdian memoria eta espazio publikoari buruz hainbat hausnarketa egin ondoren, «memoriaren transmisioa» espazio publikoagaz lotzea beharrezkotzat ikusi zuten Lobak taldekoek: «Memoriaren transmisioa hobeto garatzeko, Gernika-Lumoko espazio publikoa ere landu behar genuela hausnartu genuen. Izan ere, 1937ko bonbardaketan, Gernika ia bere osotasunean desagertu zen».
Gernika-Lumoko memoriaren lanketa egin duten eragile ezberdinen informazioa lortu, eta hori teknologia berrietan zabaltzea dela egin gura dutena zehaztu zuten aurkezpenean; hau da, «informazioa modu entretenigarrian dibulgatzea». Horretarako, «pedagogikoa» den mapa egin gura dute Lobak taldekoek; gazte zein nagusientzako baliagarria den produktua eraiki.
Horrela, herriko memoria lantzen diharduten eragileekin bi bilera egin zituztela adierazi zuten proiektuaren aurkezpenean; Gernika-Lumoko mapa interaktiboa helburu hartuta lan egiteko eta herriko mapan dauden puntu garrantzitsuak aztertu, eta lantzeko.
«Herriko mapan egon ahal diren puntu garrantzitsuenak identifikatu eta puntu horiei balio berri bat eman nahi zaie», aitortu zuten arduradunek, eta mapak horretarako balioko duela azaldu zuten; besteak beste, herriko eraikinen inguruko informazio, testigantza, argazki zein bideoak batuko dituzte.
Mapa interaktiboa kokatzeko eta dibulgatzeko «euskarri egokiena» Internet zela eta, «metodo egokiena» mapa egitea zela erabakita ekin zioten lanari. Gainera, mapak etorkizunean proposamenak batzea ahalbidetuko duela ere adierazi zuten Lobek. «Hala eta ere, etorkizuneko proposamenak gehitzea bigarren fase batean burutuko da. Lehenengo, produktua sortu nahi dugu».
Diru bilketa
«Informazioa jasotzeak, proiektua zein euskarritan jarriko den erabakitzeak eta hori gauzatzeak atzean lan asko dauka, eta dirua beharrezkoa dela ikusi dugu», aitortu zuten Lobek. Horrenbestez, proiektua gauzatzeko beharrezkoak dituzten 3.250 euroak lortzeko, 40 eguneko diru bilketa egiten dabiltza Gernikako Lobak. Barikutik aurrera eta ondorengo 40 egunetan, Verkami deitutako web orrialdearen bitartez jendeak sari baten truke diru ekarpena egin dezakeela jakitera eman zuten, hain zuzen ere, aurkezpenean.
Diru bilketagaz lortuko duten dirua bere osotasunean «proiektua egiteko» erabiliko dutela adierazi zuten Lobek, eta dagoeneko kantitatearen ia erdia lortu dute, 1.485 euro eskuratu baitituzte hiru egunetan.
Diru bilketak, gainera, proiektuaren «irudia gorpuzten» lagunduko duela uste dute Gernikako Lobak taldekoek; kamisetak, oihalezko poltsak, maparen horma irudia eta webgunean aipamena dira diru bilketa horretan herritarrek erosi ahal dituzten produktuak.
