Herritarrek umeentzako jolasgune estaliaren aurreproiektuari ekarpenak egiteko aukera izango dute
Bermeoko aurrekontu parte-hartzaileen prozesuaren barnean, umeentzako jolasgune estalia izan da herritarrek aukeratu duten proiektua. Honen nondik-norakoak lantzeko Bermeoko Udalak ume eta nagusiekin tailerra egin ondoren, Erreten Lameran kokatuko den jolasgune estaliaren aurreproiektua osatu eta orain herritar guztiei euren ekarpenak egiteko aukera eman zaie, apirilaren 20ra arte.
Udalaren webgunean aurreproiektua ikusteko aukera izango da. Hemen, aterpe-gunerako planoak, materialak, altzariak eta bestelako azalpenen berri izan ahalko dute herritarrek, eta noski, aurreproiektua aztertu eta balizko iruzkinak egiteko aukera edukiko dute. Proposamen hauek urigintza@bermeo.eus helbide elektronikora bidali beharko dira, edota Berhaz bulegoan aurkeztu.
Epea bukatu eta iruzkin guztiak bildutakoan, teknikoek proposamen horiek bideragarriak diren aztertuko dituzte eta hauek proiektura gehitzea posiblea den ikusiko dute.
Aurreproiektuan, egun euritsuetan umeek jolastu ahal izateko 310 m2ko estalitako gunea proposatzen da. Estalki garden bat ezarriko dute, eta hau baso itxurazko paisaian barneratuko diren metaleko zutoin batzuek eutsiko dute.
Aurreproiektuaren diseinuak. Argazkia: Bermeoko Udala.
