Proiektu bat bukatu, beste bati hasiera emateko
Hasten den guztiak izan ohi du amaiera, eta Sareren Aterabidetik dispertsiometraiari ailegatu zaio berea. Barikuan eman zioten amaiera ofiziala, Gernika-Lumoko Astra kulturarako fabrika sozialean, Azken emanaldia izan dadila izenburupean. 50 bat lagunen artean, dokumentalaren ez-ohiko emanaldia egin zuten; tarteka, Sareko kideen adierazpenak uztartuz. Lehenengo, Erradiografiak liburuxka atera zuten, eta ondoren Aterabidetik dispertsiometraia; batean zein bestean hainbat lagunen parte hartzea izan dute, eta horiek eskertzeko baliatu zuten barikuko ekitaldia. Hala, orain arteko proiektuekin zer bilatu nahi izan duten ere azaldu zuen Astran Gernika-Lumoko Sarek. Eta, horregaz batera, bertaratutakoei helarazi zioten argazkigintzari lotutako proiektu berriari ekingo diotela aurrerantzean. “Proiektu berri bati ekingo diogu, baina jarraituko dugu aurretik egin ditugun hainbat ekimenekin”.
Hala, martitzenerako Bake-Leku txokoagaz elkarlanean antolatu duten hitzaldi-solasaldiaren deialdia zabaldu zuten. Garai berri baterako espetxe politika izenburupean egingo dute mahaingurua, Elai-Alai aretoan, 20:00etan. Bertan parte hartuko dute Garbiñe Biurrun Euskadiko Auzitegi Nagusiko Lan Arloko presidente eta EHUko irakalseak eta Agus Herran Foro Sozial Iraunkorreko dinamizatzaile eta kazetariak. Humberto Unzueta kazetariak moderatzailearen papera beteko du. Bestalde, bonbardaketaren harira, apirilaren 28rako aurreikusita daukaten ekimenaren berri ere eman zuten.
Bertaratutakoen erantzunagaz “pozik” da Sare, eta “giro ona” sortu zela adierazi du. Barikuko hitzordua, gainera, sarekideen inplikazioa eskatzeko ere erabili zuten. Izan ere, Sareren asmoa dispertsioak 30 urtetan Gernika eta inguruetan eragindakoaren argazki bat egitea da, eta, horretarako, “era batean edo bestean dispertsioaren eraginpean egon diren pertsonen argazkiak” lortu nahi dituzte. Datu base bat sortuko dute, eta hori posible egiteko, jende guzti horren informazioa behar dutela azaldu dute; “horretarako, sarekideen laguntza behar dugu”. Laguntza eskaera horren aurrean, barikuan Astran bildutakoek “ondo” erantzun zutela dio Sarek.
Pertsona desberdin eta anitzez eraikitako sareak, bere aldetik, denok etxean izan arte lanean jarraitzeko asmoa agertu du. “Aldarrikatzen dugu horrelako gehiago egitearen beharraren azkena izan dadila. Aterabidetik ekarpena izan dadila hau ere, zinez”.
Barikuko ekitaldiaren argazkiak (Kostan Delgado):