Bihar gauerdira arte luzatu dute Etxera Trailen izena emateko epea
Domeka honetan [urtarrilak 28] egingo den Etxera Trail proban web orrialdetik izena emateko epea luzatu dute. Hasiera batean, hilaren 21a arte jarri zuten horretarako aukera, baina bihar gauerdira arte (23:59ak arte) izena eman daiteke www.etxeratrail.eus. helbidean.
Jakitera eman dutenez, mendi lasterketarako egunean bertan 25 dortsal egongo dira. Martxa luze eta laburrerako, ostera, ez da mugatuko izen ematea.
Lasterketan aldez aurretik izena ematen dutenek 12 euro ordaindu behar dituzte, eta mendi martxetan izena ematean, berriz, 10 euro ordaindu behar dira. 12 urtetik beherakoentzat doakoa da. Domekan izena emateko aukera egongo da, eta orduan 14 euro ordaindu beharko dituzte 12 urtetik gorako parte hartzaile guztiek.
Bigarren urtez egingo dute dispertsioaren kontrako proba. Mendi lasterketaren eta martxa luzearen ibilbidea 15,5 kilometrokoa izango da, eta mendi martxa txikia, ostera, 6 kilometrokoa izango da.
Irteera orduak. Martxa luzeko partaideak 09:00etan aterako dira Pasealekutik, eta ordu bete beranduago hasiko da mendi lasterketa. Jarraian, 10:15ean dute irteera ordua 6 kilometroko mendi martxakoek.
