Kankinkabarakoek bisigu barik ospatu dute aurten San Anton Eguna
San Anton Eguna izan zen atzo, eta hutsik egin barik Kankinkabara Txistu Taldeko kideak kalera atera ziren iluntzean. 19:30etik 22:00etara herriko kaleak girotu zituzten.
Kalejirarekin, sasoi honetan arrantzaleak bisigua arrantzatzera ateratzen zirela ekarri nahi dute gogora Kankinkabarakoek. Izan ere, garai batean txistulariek agurtzen zituzten arrantzaleak, portutik bertatik, eta haiek itzultzean modu berberean ematen zieten ongi etorria. Orain dela zazpi urte berreskuratu zuten Bermeoko txistulariek antzinako ohitura hori.
Urtero, kalejiran, bisiguak botatzen dizkiete. Aurten, hala ere, ez dute halakorik ikusi; itsaso txarra egon denez, arrantzaleek ezin izan dute arrantzatzera atera.
Kalejira amaitu ostean, elkarrekin afaldu zuten Kankinkabarako taldekideek.
Kankinkabara Txistu Taldea. Argazkia: Ana Ormaetxea
Kankinkabarako txistulariak portuan. Argazkia: Ana Ormaetxea
