Jaiotza jartzeko irteera egingo dute Sollubekoek barikuan
Urteroko hitzorduari eutsiko dio beste urte batez Sollube 707 mendizale taldeak. Hutsik egin barik, hortaz, jaiotza jartzera hurbilduko dira Bermeoko Burgo mendira. Urtero egin legez, mendizaleek irteera antolatu dute barikurako; 09:00etan jarri dute ordua, Atalde kaleko Artike enparantzan. Handik elkarrekin egingo dute Burgorako bidea.
Gurasoek seme-alabekin batera egiteko irteera “polita eta erraza” dela diote mendi taldekoek. Hainbat izaten dira, gainera, urtero parte hartzera animatzen diren ume eta nagusiak; “elkarrekin, ondo pasatzeko aukera ematen baitu”.
Mendi tontorrera igota, ikurrina altxatu eta jaiotza jarriko dute; ondoren, indarrak berreskuratzeko txistorrada egingo dutela azaldu dute antolatzaileek. Eguraldi ona egiten badu, Burgon bertan egingo dute txistorrada. Euria egingo balu, baina, Mañuko frontoira jaitsi, eta han egingo luketela esan dute.
Familian egiteko irteera polita dela iritzita, herritarrak animatu dituzte parte hartzera.
Umeak ikurrina altxatzen, iaz. Argazkia: Sollube 707
