Zerrendak eskariz betetzeko sasoia
Herrilana du lema Errigoraren kanpainak, eta auzolanean prestatu dituzte milaka saski, euskarari puzka datozen nafar produktuz beteriko otzarak. Orain zerrendak eskariz betetzeko ordua da, eta euskal herritarrek horretarako aukera izango dute azaroaren 14a bitartean. Bi saski prestatu dituzte boluntarioek, zuria eta beltza.
Errigoraren webgunean eskatu daitezke saskiak, horretarako aukera ematen duten eskaera puntuetan (www.errigora.eus). Bestela, esakerak egiteko tokiz toki horretarako guneak egokitu dituzte Euskal Herriko hainbat herritan. Busturialdean, Lea-Artibain eta Mutrikun ere otzarak eskatzeko guneak jarri dituzte.
Elikadura burujabetzaren eredua jarraituta, eta Nafarroako ekoizleei bultzada emanez, euskarari ere arnasa ematen dio Errigora ekimenak.
Izan ere, saskien salmentatik biltzen duten diru guztiaren %25 Nafarroa hegoaldeko, euskara ofiziala ez den zonaldeko, euskalgintzari laguntzera bideratzen dute ekimenaren bultzatzaileek.
Hori da egitasmoaren helburuetako bat, baina baita Nafarroa hegoaldeak propio dituen produktuak Euskal Herriko plazan kokatzea ere, urrunekoen ordez bertokoen kontsumoa bultzatzeko.
«Herria egiteko» aukera. Oreretan egin zuen udazkeneko kanpaina abiatzeko ekitaldia, eta bertan jarri zuten, baita, tokiz toki ibili den Errigoraren karpa ibiltaria.
Ekitaldi hasieran, Oreretako Errigorako lantaldeko kide Eneko Guridik azaldu zuenez, «Nafar hegoaldeko euskalgintzak hain beharrezkoa duen elkartasunezko puzkada anaikor bat bidaltzeko aukera» dute kanpainarekin bat egiten duten herritarrek. Horrela, zonalde horretako nekazariei beraien ogibidean lagunduko dietela esan zuen, ekimen alai, anitz eta behetik gorakoa dena hauspotzeagaz batera. Hain zuzen, «herria egitekoa», Guridiren esanetan.
NON ESKATU
Bermeo.
– Berhaz.
– Alkartetxea.
– Kultur etxea.
– Bolatokia.
– Eleizalde ikastola.
– Erroxape.
– Euskaltegia
-LAB.
Gernika-Lumo.
-Astra.
– Gernikako AEK.
– Seber Altube ikastola.
Ea.
-Natxituan.
Argazkia: Errigora
