Euskal sortzaileak izango dira IV. Marabilliko protagonista nagusiak
Urriaren 5, 6, 7 eta 8an ospatuko da sormen festibala Ondarroan. Zea Mays, Amparanoia eta Zopilotes Txirriaos taldeen kontzertuak izango dira hitzordu garrantzitsuenakEuskal sortzaileak izango dira Ondarroan ospatuko den IV. Marabilli Sormen Festibalek...
Urriaren 5, 6, 7 eta 8an ospatuko da sormen festibala Ondarroan. Zea Mays, Amparanoia eta Zopilotes Txirriaos taldeen kontzertuak izango dira hitzordu garrantzitsuenak
Euskal sortzaileak izango dira Ondarroan ospatuko den IV. Marabilli Sormen Festibaleko protagonistak. Urriaren 5etik 8ra ospatuko da.Urtero legez, Manuelistak dira antolatzaileak, eta aurreratu dutenez, aurtengo jaialdiak euskal sortzaileengan jarri du indarra. Hala, ondoko sortzaileek parte hartuko dute, besteak beste, aurtengo jaialdian: Jon Maya, Asier Altuna, Ander Lipus, Pako Aristi, Miren Amuriza, Thierry Biscary Manez, Zea Mays, Oskar Alegria, Iratxe Fresneda, Joseba Irazoki, Antxon Uskola, Oier Ituarte eta Igor Zalakain.
«Oraintxe bertan hazten ari den belaunaldi bikain baten testigantza jaso nahi da. Zinegileak, idazleak, musikariak, aktoreak, argazkilariak, dantzariak, sukaldariak bilduko ditu gure egitarauak, eta ziur gaude egitarautik kanpo ere asko etorriko direla Ondarroara, Marabilli horixe bihurtu baita, alor desberdinetako sortzaileak elkartzeko data ezinbesteko bat, agertokian bertan eta agertokitik kanpo», azaldu dute Manuelistek.
Jaialdia urriaren 5ean hasiko bada ere, irailaren 29tik aurrera Oier Ituarte argazkilari ondarrutarraren Aztarnak erakusketa egongo da ikusgai Udal Erakusketa Aretoan Marabilli amaiera arte.
Radixu Irratiaren irratsaioak emango dio hasiera jaialdiari eguenean (5ean), eta arratsalderako Marabilli Parade kalejira antolatu dute, 19:30ean hasita, Kofradia Zaharretik Beikoziniraino. Horren ostean, hasiera ekitaldia eta zinta mozketa egingo dituzte. Ondoren, urtero hain arrakastatsua izaten den 10 minutu ekitaldia hasiko da. Sei sortzailek bakoitzak 10 minutuan, euren lanaren sormenari buruz esateko daukatena azalduko dute. Ostean, Kukai dantza konpainiaren ikuskizuna ailegatuko da.
Saririk ere egongo da. Hala, urriaren 7an, I. Euskal Herriko Sormen Saria emango dute antolatzaileek. «Sormenaren alor zabalean nabarmendu den persona bati emango zaio sari hori». Saria ez da dirua izango; diotenez, «horretarako badaude beste sari batzuk». Sarituari bere itxura daukan buruhandi bat emango diote.
Omenaldia
IV. Marabilli Sormen Festibalak Jose Mari Argoitia San Martin hasieratik Marabillako kide izan zenari omenaldia egingo dio. Lehenengoa, zapatu goizean izango da, 12:00etan, Bide Onera zineman; «omenaldi formalagoa» izango da, antolatzaileen esanetan. «Omenaldi berezia eskaini nahi diogu, eta horretarako Itoiz taldeko Juan Carlos Perez eta Jose Garate Foisis izango dira gurean kontu-kontari». Beste omenaldia gauean egingo diote Zubi Zaharraren aurrean, eta aurreratu dutenez, unerik hunkigarriena izango da.
