222 mendizalek egin dute Markina-Xemeingo 52. Ibilaldi Neurtua
Euria ez da eragozpena izan parte hartzaileentzat, eta «gustura» ibili direla adierazi dute. 127 mendizalek egin dute ibilbide luzea, eta 95 ibiltarik laburraEuria ere ez zen eragozpena izan Artibai Mendigoizale Taldeak antolatuta, domekan Markina-Xe...
Euria ez da eragozpena izan parte hartzaileentzat, eta «gustura» ibili direla adierazi dute. 127 mendizalek egin dute ibilbide luzea, eta 95 ibiltarik laburra
Euria ere ez zen eragozpena izan Artibai Mendigoizale Taldeak antolatuta, domekan Markina-Xemein inguruetan egin zen 52. Ibilaldi Neurtuko parte hartzaileentzat. Urtero modura, bi ibilbide ezberdin jarri zituen aukeran Markina-Xemeingo mendigoizale taldeak, 26 kilometroko ibilaldi luzea eta 10 kilometroko laburra. 127 mendizalek hartu zuten parte lehenengoan, eta 95 ibiltarik aukeratu zuten, berriz, bigarrena.Eguraldi onagaz hasi zen ibilaldia, eta euria iragarrita zegoen arren, eguerdiraino eutsiko zuen esperantza zeukaten parte hartzaile zein antolatzaileek. Baina goiz erdian hasi zen euria, eta mendizale guztiak bustita ailegatu ziren Arkupean zegoen helmugako mahaira.
Hori dela eta, gustura hartu zituzten antolatzaileek proba amaierarako eskatuta zituzten udalerriko frontoi nagusiko dutxak. Batez ere, ibilaldia egitera kanpotik etorri zirenek.
Markina-Xemeingoez gain, eskualdeko mendizaleak (Ondarroa, Lekeitio, Ziortza-Bolibar, Aulesti), inguruko herrietakoak (Elgoibar, Berriz, Durango) eta Bilboaldetik zein Gipuzkoatik etorritakoak (Bilbo, Galdakao, Portugalete, Hernani) bildu zituen urteroko hitzorduak, bai eta Hendaiako kuadrilla bat ere.
Aurretiaz izena emateko aukera eskaini zuten antolatzaileek, eta 120 lagunek aprobetxatu zuten aukera hori. Hala ere, asko izan ziren egunean bertan izena eman zutenak ere, 102 partaidek, hain zuzen ere.
Erorketa
Euria egin zien arren, partaideek oso gustura ibili zirela adierazi zuten amaieran, eta antolakuntzagaz pozik agertu ziren. Dena ondo joan baldin bazen ere, istripu bat egon zen. Mendi-pista batean erori egin zen 57 urteko gizonezko bat. «Istripua ez zen larria izan, baina bai deigarria. Urratu bat egin eta barize batetik odoletan hasi zen kolpatua. Lekeitioko erizain batek lagundu zigun larrialdi zerbitzuak heldu zirenera arte», azaldu dute mendigoizale taldekoek.
