Lekeitio adinekoekin adeitsua izateko proiektua jarriko du martxan udalak
Herritarrak proiektu berrian parte hartzera gonbidatu dituzte. Egitasmoaren lehen pausoa talde eragile edo dinamizatzailea osatzea izango da. Martxoaren amaieran hasiko da elkarlanaGaurtik aurrera, Lekeitioko Udalaren proiektu berrian parte hartzeko go...
Herritarrak proiektu berrian parte hartzera gonbidatu dituzte. Egitasmoaren lehen pausoa talde eragile edo dinamizatzailea osatzea izango da. Martxoaren amaieran hasiko da elkarlana
Gaurtik aurrera, Lekeitioko Udalaren proiektu berrian parte hartzeko gonbidapena jasoko dute lekeitiarrek, Lekeitio adinekoekin «herri atsegina» proiektuan parte hartzeko gonbidapena, hain zuzen.Gero eta gehiago dira 80 urte baino gehiago betetzen dituzten pertsonak, bai eta Lekeition ere. Hori dela eta, udalak Lekeitio adinekoekin adeitsua bihurtzeko proiektua bultzatzea erabaki du. «Bizitza luzeagoa oso baliabide baliotsua da. Zahartzaroa zelan bizi eta bizitza osoa zelan garatu behin eta berriz pentsatzeko aukera ematen du. Eta horrek, banakako ariketa ematen duenak, ariketa kolektiboa ere izan behar du», dio udalak.
Martxan jarri nahi den proiektu berriaren helburua, Lekeitio adin guztientzako udalerri bilakatzea da eta, horretarako, zahartze aktiborako eta osasungarrirako baldintza egokiak sortzea eta bideak ematea. «Azken finean, Lekeitio adinagaz atseginagoa izan dadin lortu nahi da, adinekoak daukaten potentziala balorean jarriz», azaldu dute udal arduradunek.
Talde eragilea
Proiektuaren protagonistak adinekoak eurak izango direla azpimarratu dute, eta lan-esparru parte hartzailea emango diete, «zahartze aktiborako eta osasungarrirako dakarten inguruneko elementu nagusiak eurak zehazteko». Hala ere, proiektuan gazteen ikuspuntua ere beharrezkoa dela ikusi dute, eta horiez gain, udaleko eta Bizitzen Fundazioko profesionalak ere izango dira bidelagun.
Proiektua gauzatzeko lehen pausoa talde eragile edo dinamizatzailea sortzea da, eta horretarako udalak herritarrengana joko du. «Herritarrak dira herriko errealitatea ezagutzen dutenak, eta Lekeitio beraien erara egin nahi dugu».
Proiektuan parte hartzeko gonbidapena 55 urtetik gorako eta 18 eta 25 urte bitarteko herritarrei zuzentzen zaie. Interesatuta daudenek etxeko postontzian aurkituko duten orria bete eta Lekeitioko Udaleko Bulego Orokorretan entregatu dezakete edo, beraien datu eta guzti, agurtzane-ongintza@lekeitio.eus helbidera bidali.
Izena eman duten herritarrekin martxoaren amaieran hasiko da elkarlanean udala. Lehendabizi Adinekoekin hiri adeitsua egitasmoaren inguruko prestakuntza edota formakuntzaren lehen saioak emango dituzte.
