Ibarruriko mendi martxen eta lasterketaren izen ematea zabaldu dute
Martxoaren 12an da proba, baina, aurretik izena emateko azken eguna martxoaren 6a da. www.urdaibaikopa.eus webgunean bete behar da izena emateko orria. Aldez aurretik izena emanez gero, 8 euro ordaindu behar dira, eta egunean bertan izena ematen dutenek 12 euro ordaindu beharko dituzte.
Urdaibai Koparen lehen proba puntuagarria izango da. Lasterketan parte hartzen duten korrikalariek 21 kilometroko ibilbidea burutuko dute, 10:00etan Ibarruriko plazatik irtenda.
Era berean, 21 kilometrokoa izango da mendi martxa luzea, eta bertako partaideentzat 08:30ean ipini dute irteera-ordua. Bestalde, martxa laburra egitera doazenak 10:10ean aterako dira plazatik, eta 8 kilometroko ibilaldia burutuko dute.
Mendi martxen zein lasterketaren parte hartzaileentzat lau anoa postu egongo dira (bitan likidoa eta solidoa egongo da, eta beste bietan edariak bakarrik).
Argazki lehiaketa
Saltsamendi Kultur Elkarteko kideek, probarako argazki lehiaketa antolatu dute lehenengoz. Esan dutenez, horrela, kirola, lagunartea eta bertako paisaiez gozatzea saritu nahi dute. Horretarako, ibilbidean zehar ateratako argazkiak ibarrurikomendimartxa@gmail.com helbidera bidali beharko dituzte argazki lehiaketan parte hartzen dutenek.
Jasotako guztien artean hiru opari berezi banatuko dituztela jakitera eman dute.
Edozein zalantza argitu, edo arazoren bat izanez gero, ibarrurikomendimartxa@gmail.com helbidera mezua bidaltzeko eskatu dute. Halaber, probari buruzko informazioa sites.google.com/site/ibarrurikomendimartxa eta www.urdaibaikopa.eus atarietan dago.
