Demasa aurkeztu dute, Mutrikuko euskaltzaleen prozesu parte hartzailea
Mutrikun berezko hizkuntzak euskara izaten jarraitzea nahi dute. Euskararekin aktibatuta daudenak eta ez daudenak batu nahi dituzte. Hiru saio egingo dira, ZabielenUdal Euskara zerbitzuak eta Bai Txo! Euskara elkarteak elkarlanean, prozesu parte hartza...
Mutrikun berezko hizkuntzak euskara izaten jarraitzea nahi dute. Euskararekin aktibatuta daudenak eta ez daudenak batu nahi dituzte. Hiru saio egingo dira, Zabielen
Udal Euskara zerbitzuak eta Bai Txo! Euskara elkarteak elkarlanean, prozesu parte hartzailea burutu nahi dute Mutrikun, etorkizunean euskararen erabilera sendotzeko eta errazteko neurriak bilatu eta adosteko. Eta horretarako, Demasa Denok Mutrikun Saretzen parte hartze prozesua aurkeztu dute.Prozesu parte hartzailearen helburu nagusia herritar guztien artean Mutrikun berezko hizkuntzak euskara izaten jarrai dezan bideak eta baldintzak irudikatzea izango da. «Euskararik onena egiten den euskara denez, herriko eragileek ere horretan duten garrantzia azpimarratu nahi dugu».
Oro har, herritarren artean hausnarketa gauzatzea eta hausnarketa horretan helburu batzuei begira jartzea dela azpimarratu dute.
Topagunearekin batera
Eta herritarren ekarpenak berezibikoak izango direla azaldu dute. Hain zuzen ere, Demasa parte hartze prozesuan euskararekin aktibatuta daudenak eta ez daudenak batu nahi dituzte antolatzaileek, helburu amankomun bat ipinita: herritarrak Mutriku euskaldun bati begira jartzea, alegia. «Oso garrantzitsua eta eraginkorra dela iruditzen zaigu. Merkataritzan, kirolean, bestelako kultur ekimenetan dabiltzanak…, horrek denak gustatuko litzaiguke parte hartzea prozesu honetan. Azken batean, gaur egun euskararen erabilera egiten baldin badute, etorkizunean ere euren jardunean euskaraz aritzeko ardura beraiek izango dutelako».
Parte hartze prozesua Euskaltzaleen topagunearekin batera koordinatuta burutuko dute, eta bertan hiru helburu lortu nahi dituzte: batetik, Mutrikuko euskalzaleak saretu eta trinkotzea, bestetik, Mutrikun euskararen erabileraren baitan egun dauden egitasmoak edo etorkizunean egon daitezkeenak irudikatzea eta erabakitzea, eta, azkenik, Mutrikuko euskaltzaleak nola antolatu erabakitzea.
Horretarako, hamabostean behin batuko dira Zabiel kultur etxean. Guztira, hiru saio egingo dira, otsailaren 18an, martxoaren 4an eta martxoaren 18an, 10:00etatik 13:00etara bitartean. Saioak «oso dinamikoak» izango direla eta tartean hamaiketako bat ere egingo dela aurreratu dute.
Lehenengo saioan, besteak beste, oinarri soziolinguistikoak azalduko dira. «Euskaltzaleok ditugun kezkak partekatuko ditugu, eta Mutriku hemendik hamar urtera zelan irudikatzen dugun aztertuko dugu». Bigarren saioan, berriz, herrian martxan dauden egitasmoak aurkeztuko dira, eta zer behar duten identifikatu. Azkenik, ekintzak zehaztu, eta Mutrikuko euskaltzaleak zelan antolatu ahal diren zehaztuko da hirugarren saioan.
Otsailaren 10 aurretik
Hiru saioetan edo horietako batean parte hartu nahi duten herritarrek, bestalde, aurretik baieztatu beharko dute euren parte hartzea.
Horretarako, otsailaren 10 aurretik eman beharko da izena 943-60 32 44 (udal euskara zerbitzua) edota 635 748 393 telefono zenbakietara deituta edota baitxoelkartia@gmail.com edota euskara@mutriku.net posta elektronikoetara idatzita.
