Jende asko ibili da sanmartinetan Olaia Zabalondo
Bermeoko Udalaren XV. Odoloste Txapelketaren sari nagusia Mungiara joan da aurten. Morga harategiaren buzkentza izan da, epaimahaikideen arabera, aurten gozoena.Txerrikia izan da protagonista nagusia, asteburuan, Lea-Artibai eta Busturialdeko hainbat h...
Bermeoko Udalaren XV. Odoloste Txapelketaren sari nagusia Mungiara joan da aurten. Morga harategiaren buzkentza izan da, epaimahaikideen arabera, aurten gozoena.
Txerrikia izan da protagonista nagusia, asteburuan, Lea-Artibai eta Busturialdeko hainbat herri eta auzotan. Hain zuzen ere, Aulestiko Malats auzoan, Ispasterren, Amoroton, Bermeon, Foruan eta Sukarrietako Kanala auzoan eduki dute sanmartinetaz gozatzeko aukera.Barikuan, San Martin egunean bertan, egin zituzten ospakizunak Ispasterren eta Kanalan. Ispasterren, urtero legez, gaztaina erreak jateko batu ziren Martin Deuna baselizaren inguruan, meza ostean. Kanalan, berriz, bazkari herrikoia egiteko batu ziren auzotarrak.
Amoroton eta Aulestiko Malats auzoan, aldiz, zapatuan batu ziren sanmartinak ospatzeko. Usadio zaharrei eutsita, txerri jana egin zuten Amoroton. Egunsenti txokoan hainbat herritar batu ziren, lehenengo hamaiketakoa egiteko eta gero bazkaltzeko. Eguraldi txarra egin zuenez, bazkarira joan zirenek txoko barruan jan zuten, giro ezin hobean. Aulestiko San Martin baselizan meza entzun ostean, bertaratutakoek kopaua egin zuten, trikitilariek alaituta. Eguraldi txarra egin zuen arren, taldetxoa batu zen Beitxi-Beko baserriaren aterpean eta inguruetan.
Txapelketa ugari
Foruarrek, berriz, hiru egun eduki dituzte sanmartinak ospatzeko. Egunotan, tute, igel, mus eta briska txapelketetan parte hartzeko aukera izan dute herritarrek. Hala ere, Foruko sanmartinetako txapelketarik ezagunena karakolena da eta domekan egin zuten. Aurtengoa 37. txapelketaren izan da, eta hamaika kazola aurkeztu dituzte. Epaimahaiaren arabera, kazolarik gozoena Laka izenekoa izan zen. Hala ere, guztiek jaso zituzten sariak.
Domekan, gainera, XIV. Nekazal azoka egin zen Foruan. Baserritarrek zein artisauek beraien produktuak erakusteko eta saltzeko aukera eduki zuten, 21 salmahaitan. Horregatik, udaletxe ingurua jendez bete-bete egin zen. Urdaibai Dantza Taldearen saioa eta aizkolarien erakustaldia ere egon ziren.
25 harategi lehian
Bestalde, San Martin egunaren harira, Andeko Tabernak Bermeoko Udalaren laguntzagaz antolatzen duen Bermeoko Udalaren XV. Odoloste Txapelketa lehiatu zen domekan. 25 harategik parte hartu dute aurten, eta, epaimahaiaren arabera, Mungiako Morga harategiak egin duen buzkentza izan da gozoena. Bermeoko Mikel Izarzugaza harategiari eman diote bigarren saria, eta hirugarrena, berriz, Bermeoko Baserri harategiari. Urtero legez, domekan Lameran jarritako azokaren baitako erakusmahaien artean politena ere aukeratu eta saritu zuten: Bermeoko Barturen harategiarena.
Morga harategiko harakin Jon Orue «oso pozik» zegoen domekan bere harategiaren erakusmahaian, lehenengo saria jaso ondoren. Ez da Bermeoko odoloste txapelketan lehenengo saria jasotzen duten lehenengo aldia, beste urteren batean ere jaso izan dutela aipatu zuen eta. Gainera, beste hainbestetan, bigarren eta hirugarren sariak ere jaso izan dituzte.
Sariek salmentetan «asko» laguntzen dutela esan zuen, batez ere, «azokaren azken orduetan». Aurtengo buzkentzik gozoenak «sekreturik ez» duela azaldu zuen, eta gainontzeko urteetan aurkeztutako buzkentzen moduan egindakoa dela gaineratu zuen. Aurten, baina, «zorte ona» izan dutela uste du Oruek: «Gurea izan du epaimahaiak gustukoena».
Euriak atseden apur bat eman zuen goizean, eta jendez bete zen Lamera. Txerrikia eskuratzeko aukera izateaz gain, San Martin azokak beste hainbat produktu bildu zituen.
