Tailer bat egingo dute bihar Mugarri parte hartze prozesuaren barruan
Herritarrek iriste erraztasuna hobetzeko proposamenak egin ahalko dituzte. Udalak hilaren 21a arte jasoko ditu ekarpenak. Abenduaren 12an aurkeztuko dute planaren zirriborroaMunitibarko udal ordezkariek joan den asteko eguaztenean aurkeztu zieten herri...
Herritarrek iriste erraztasuna hobetzeko proposamenak egin ahalko dituzte. Udalak hilaren 21a arte jasoko ditu ekarpenak. Abenduaren 12an aurkeztuko dute planaren zirriborroa
Munitibarko udal ordezkariek joan den asteko eguaztenean aurkeztu zieten herritarrei Mugarri irisgarritasuna hobetzeko parte hartze prozesua, eta bihar egingo dute hobekuntza tailerra. 18:00etan elkartuko dira udal aretoan.Udalak urte amaiera bitartean mugikortasun plan bat prestatuko du, eta horretarako bizilagunen iritziak eta ekarpenak jasoko ditu. Herritarrek biharko tailerrean izango dute haien proposamenak egiteko aukera.
Era berean, prozesuaren informazioa jasotzen duen eskuorria eta ekarpenak egiteko fitxak banatuko ditu udalak etxez etxe. Horiek bete ostean, munitibartarrek udalaren postontzietan, udaletxeko Idazkaritzan edota liburutegian utzi ahalko dituzte.
Gainera, www.munitibar.org helbidean fitxa modu telematikoan betetzeko aukera ere egongo da.
Egunerokotasunean herri-guneetan eta auzoetan oztopo arkitektonikoak jasaten dituzte herritarrek, eta, beraz, arazo horiek identifikatzeko bizilagunen laguntza ezinbestekoa dela uste dute udal ordezkariek. Zehaztu dutenez, denen parte hartzeagaz Munitibar irisgarriago baten bidean lehenengo harria jartzea da Mugarriren helburua.
Udalak azaroaren 10etik 21era batuko ditu bizilagunen proposamenak. Ondoren, abenduaren 12an jasotako ekarpenak aztertuko dituzte, eta Learri enpresa publikoko teknikariek irrisgarritasun planaren zirriborroa aurkeztuko diete herritarrei.
Bertan, azken zalantzak argitu, eta azken ñabardurak egiteko aukera eskainiko dute.
Abenduko osoko bilkura
Horrela, abenduaren 14ko udal osoko bilkuran onartuko dute Irisgarritasun plana. Learri Lea Ibarreko enpresa publikoak idatziko du.
Teknikoen irizpideen arabera txosten bat prestatu dute honez gero datu bilketa eta diagnostiko labur bat egin dituzte, eta eguaztenean hura ezagutzeko aukera izan zuten aurkezpenera bertaratu zirenek. Horren aurretik, baina, irisgarritasuna zer den eta irisgarritasun irizpideak zeintzuk diren azaldu zuten.
Halaber, udalak parte hartze prozesua zelan burutuko duen zehaztu zuten. Erabiliko duten metodologia eta kronograma azaldu zituzten, eta prestatu duten mapa erakutsi zieten herritarrei.
