Hilaren 9a, Arrantzale eguna Bermeon. Andra Mari eta Santa Eufemia jaietan, egun berezia dute gaurkoa bermeotarrek. 11.00etako mezaren ostean, kalejiran joan dira udal ordezkari eta herritarrak, portuan arrantzaleei omenaldia egiteko. 10 urte daramatza Lamera Gane txokoak arrantzaleak omentzen, eta aurten bateleru eta kordeleruak omendu dituzte.
Horiekin batera, Juan Apraiz ‘Coyote’ ere omendu dute gaur. Itsasoarekin lotura izan duten pertsona eta elkarteei aipamen berezia egiten diote urtero, omenaldian; eta Apraiz omendu dute gaurkoan.
Arrantzaleei egindako omenaldian, gainera, gonbidatu berezi bat izan dute aurten: arrantzaleen omenez portuan dagoen ‘Itzulera’ eskulturaren egile Casto Solano, hain zuzen ere. Eskultura, brontzez egina, Sevillako Expo 92ko Euskadiko pabiloian aurkeztu zuen Solanok lehenengo aldiz. Gutxi gorabehera, bost metroko altuera dauka eta arrantzale bat eta bere semearen irudia adierazten du.
13.30ean Goiko plazatik Taraskarainoko kalejira egin dute, herria kolorez jantziz. Aurten, talko zuria ez ezik, koloretakoa ere jarti dute herritarrek kalejiran. Taraskan, ohikoa den legez, lore eskaintza egin dute.