Alde Zaharreko lore lehiaketak baditu irabazleak
Bermeoko Udalak, herriko hainbat elkartegaz elkarlanean, Alde Zaharreko balkoi, leiho eta fatxaden lore lehiaketa antolatu du, eta gaur egin dute sari banaketa ekitaldia.
Fatxaden kategorian, Nardiz Tar Jon kaleko 14 zenbakidun atariak jaso du saria. 300 euroko saria jaso dute. Gainera, etxebizitza bakoitzeko arduradunek, Aita Guria baleontzirako bi lagunentzako sarrera berezia ere jaso dute; sarrera horregaz, 2016an nahi beste aldiz sartu ahalko dute.
Balkoirik ederrena, epaimahaikoen arabera, Erremedio kaleko 9 zenbakidun atariko 2. solairuarena da. Irabazleak, Berton elkarteko dendetan gastatzeko 150 euro eta Aita Guria baleontzirako sarrera berezia jaso ditu.
Azkenik, leiho ederrenaren saria Talakoetxea kaleko 18 zenbakidun atariko 2. solairuko bizilagunak jaso du. Alde Zaharreko tabernetan kontsumitzeko bonoa eta Aita Guria-rako sarrera berezia jaso ditu.
Irabazleek, gaur goizean, Goiko Plazan egin den sari banaketa ekitaldian jaso dituzte sariak. Guztira, 20 parte hartzaile izan dira lore lehiaketan. Antolatzaileek parte hartzaile guztiek egindako ahalegina txalotu gura izan dute: “Lore lehiaketa gure Alde Zaharra indartzeko eta edertzeko emandako pauso bat izan da, eta parte hartzaileek helburu hori lortzen lagundu digute”.
Hala, parte hartzaile guztiei eskerrak eman dizkie lore lehiaketako antolatzaileek. Azaldu dutenez, “Alde Zaharreko eraikinak loreekin betetzeak, duda barik, Alde Zaharraren irudia asko edertzen du; loreekin dauden lekuak, leku biziak direlako”.
Antolatzaileek lehiaketaren balorazio positiboa egin dute, eta hurrengo urtean ere antolatzeko prest agertu dira, “ideia eta proposamen berriekin”.
Irabazleak sariekin
Fatxadarik onena: Nardiz Tar Jon 14
Balkoirik onena: Erremedio 19, 2.
Leihorik onena: Talakoetxea 18, 2.
