Gurutze Gorria eta Busturialdeko Mankomunitatea lankidetzan arituko dira
Herritar ahulenei laguntza emateko, gizarteratze arloko hitzarmena sinatu dute erakunde biek. Helburua da boluntarioen lana uztartzea eta ahulezia egoeran dauden herritar eta familientzat, zein pertsona nagusientzat hurbiltasun eta laguntza programa habian jartzea.
Hitzarmena sinatu dute Busturialdeko Gizarte Zerbitzuen Mankomunitateko presidente Ana Hormaetxe Ugaldek eta Jose Maria Elordui Gurutze Gorria Gernikako presidenteak. Mankomunitateak 14.982 euroko ekarpena egingo du, ekintza horien parte bat finantzatzeko.
Erakunde biek elkarlanean aritzeko konpromisoa hartu dute, eta, batez ere, hiru esparrutan lan egingo dute: pertsona nagusientzako hurbiltasuna eta laguntza emateko programa garatzen, ahulezia egoeran dauden herritar eta familiei babes ekonomikoa ematen eta komunitate arloan partaidetza sustatzen, boluntariotzaren bitartez.
Horrela, Gurutze Gorriak bi proiektu jarriko ditu martxan: gizarte egituretatik kanpo gelditzeko arriskuan dauden pertsona eta familiei laguntza ematekoa da horietako bat, etxeko hileroko premiazko gastuei aurre egiteko laguntza ekonomiko zuzena emanez; bestea, pertsona nagusi eta aniztasun-funtzionala duten herritarrei laguntzeko programa, autonomia pertsonala eta gizarteratzea sustatzeko.
Lankidetza hitzarmen horrek zortzi hilabeteko iraupena izango du, 2016ko maiatzaren 1ean hasi eta abenduaren 31 arte.
Gurutze Gorriko eta Mankomunitateko ordezkariak lankidetza hitzarmenaren aurkezpenean
