Bizkaiko Batel Txapelketa jokatuko dute asteburuan
Sestaon lehiatuko dute. Zapatu arratsaldean sailkapenak egingo dituzte, eta domeka goizean izango da txapelketa.
Hain zuzen ere, etzi 15:30ean hasiko dira sailkapenak, eta domekan, 11:00etatik aurrera jokatuko dute txapelketa.
Batel liga amaituta
Aurreko asteburuan amaitu zuten Bizkaiko Batel liga, eta bermeotarrak mutilen ume eta kadeteen mailetan nagusitu dira.
Umeetan, 265 puntu bildu ditu Bermeok. 170 puntugaz Urdaibai hamargarrena izan da, eta haren atzetik sailkatu da Elantxobe 67 puntugaz. Bermeo B taldeak hamahirugarren amaitu du denboraldia, 48 puntugaz.
Nesketan, ume eta kadete mailan 266 puntugaz Kaiku A izan da onena. Bermeo A hirugarren geratu da 249 puntugaz, eta Bermeo B seigarren sailkatu da (201 puntu). Elantxobe 66 puntu bilduta hamabosgarrena izan da.
Halaber, nesken gazte eta senior kategorian Kaiku A izan da garailea. Bertoko taldeei dagokienez, Mundaka hamaikagarren geratu da 110 puntugaz, eta Elantxobe azkena izan da sailkapenean, 22 puntugaz.
Mutiletan, Bermeoko kadeteak 299 puntugaz nagusitu dira. Mundakarrek zazpigarren amaitu dute 205 puntugaz, eta elantxobetarrak 123 puntugaz hamalaugarren bukatu dute batel denboraldia.
Bestalde, mutilen gazte kategorian Kaiku A izan da garailea, 294 puntugaz. Bermeo bederatzigarren sailkatu da, 193 puntugaz, eta Elantxobe hamaseigarren geratu da 96 puntugaz.
Seniorretan Zierbena A izan da onena (209 puntu). Mundaka A eta Bermeo laugarren eta bosgarren sailkatu dira, hurrenez hurren. Hamaikagarrena geratu da Mundaka B 72 puntugaz, eta atzetik Mundaka C sailkatu da, 63 puntugaz. Halaber, Mundaka D hamabosgarren izan da denboraldian 41 puntu pilatuta.
Argazkia: Bermeon Arraun.
Argazkia: Bermeo Arraun.
