Basurdeek 38-15 galdu dute sailkapeneko bigarrenaren kontra
Ohorezko Mailako talde indartsuenetakoa dela erakutsi du beste behin Silver Storm El Salvador Valladolidgo Gaztela eta Leon, Espainia) taldeak. Gernikarrak nahi eta ezinean ibili ziren, eta lan ona egin arren, esku hutsik bueltatu ziren etxera.
Hasierako minutuetatik partidaren jaun eta jabe izan zen El Salvador. Arriskua sortuz erasoan sendo zelairatu zen etxeko taldea, basurdeei defentsan lan handia emanez. Hala, etxekoek lortu zuten norgehiagokaren lehen entsegua. Gernikarren erantzuna berehala etorri zen, eta erasoan entseguaren bila aritu ziren. Baina, El Salvadorrek kontra erasoko jokaldi bikaina egin, eta beste entsegu bat eskuratu zuen, eta handik gutxira beste entsegu bat eginda, 19-0 jarri ziren markagailuan.
Atsedenaldira heldu aurretik aldea murriztea lortu zuen Gernika Rugby taldeak. Pietrellik entsegu bikaina egin zuen, baina, Berterok ez zuen transformazioan asmatu. Hala ere, handik gutxira berak lortu zituen beste hiru puntu.
Bigarren zatiari lehenengoaren ildo beretik ekin zioten. Hala, hamar minututan bi entsegu egin zituen etxeko taldeak. Gernikarrak ere entsegua lortzen ahalegindu ziren etenik barik, baina, ez zuten asmatu. Izan ere, haien erasoko jokaldiak gelditzeko arazorik ez zuten izan etxekoek.
Gainera, Gernikako defentsaren huts egite bat ondo aprobetxatu zuten markagailuko aldea handitzeko.
70. minutuan Morgan basurdeari txartel horia atera zion epaileak, baina, bat gutxiago izan arren, gernikarrak ez ziren kikildu, eta erasoan eta aurkariari presioa eginez aritu ziren. Ondorioz, Pietrellik bigarren entsegua lortu zuen, eta Berterok transformatu zuen.
Hiru jardunaldi
Gaur gaurkoz Ohorezko mailaren sailkapenean hamargarrena da Gernika Rugby taldea. 28 puntu ditu, eta haren atzetik 23 puntugaz dago Hernani. Sailkapeneko azkena, berriz, Pozuelo da 21 puntugaz.
2015-2016 denboraldia amaitzeko hiru jardunaldi geratzen dira, eta basurdeek gogor lan egin beharko dute puntuak pilatzeko. Izan ere, hiru aurkari indartsuren kontra jokatuko dituzte aipatu hiru partidak.
Asteburu honetan, VRAC Quesos Entrepinares liderraren kontra jokatuko dute Valladoliden. Gero, astebeteko atsedenaldiaren ostean, Barcelona izango dute aurkari. Hain zuzen ere, Barcelonaren aurkakoa izango da denboraldi honetako etxeko azken neurketa. Bathco Rugby Santardego (Kantabria, Espainia) taldea izango da basurdeen denboraldiko azken aurkaria.
Argazkia: Anuar Gomez.
