Galdona, jaiei begira
Guztia prest dago Mutrikuko Galdona auzoa Pazko Txiki jaien ospakizunetan murgiltzeko. Pazko Astelehenak bertso saioa, herri kirol jaialdia eta Gorritiren saio berezia ekarriko dituPazko Txiki jaiak ospatzeko prest daude Mutrikuko Galdona auzoan. Jai e...
Guztia prest dago Mutrikuko Galdona auzoa Pazko Txiki jaien ospakizunetan murgiltzeko. Pazko Astelehenak bertso saioa, herri kirol jaialdia eta Gorritiren saio berezia ekarriko ditu
Pazko Txiki jaiak ospatzeko prest daude Mutrikuko Galdona auzoan. Jai egun handia Pazko Astelehenean ospatuko baldin badute ere, aurretik, Aste Santuan ere zer ospatua egongo da.Urteroko osagaiekin prestatu ditu Kaltzakorta Irusta sendiak jaiak, inoiz hutsik egiten ez dutenekin. Herritarrak jaiak ospatzera gonbidatu dituzte.
Jaiak bihar abiatuko dira, 42. Tute Txapelketarekin. Bertan parte hartu nahi duten bikoteek egunean bertan izena emateko aukera izango dute. Antolatzaileek aurreratu dutenez, bikote bakoitzak 18 euro ordaindu beharko ditu izena ematerako orduan, eta kanporaketak zozketa bidez egingo dira. Irabazleek txapela eta 200 euro jasoko dituzte, eta hurrengo hiru sailkatuek ere sariak izango dituzte.
Zapatuan, aldiz, II. Mus Txapelketa jokatuko da. Izena emateko era eta sariak Tute Txapelketako berak izango dira.
Pazko Astelehenean (martxoak 28) egingo dira ekimenik gehienak, 12:00etako mezarekin hasita. Urtero egiten den modura, meza ondoren, bertsolarien saioa egingo da. Aurten, Mañukorta eta Seberio ariko dira bazkal aurreko minutuak alaitzen. Arratsaldean, berriz, euskal ohituren plaza bihurtuko da Galdona. Herri kirolen erakustaldiak aizkolari eta harri jasotzaile ezagunak bilduko ditu taberna aurreko plazan. Aizkoran Olatz auzoko Iturritza baserriko Ugaitz eta Aratz Mugertza anaiak, eta harrijasotzen, Agustin Arruti Landarbide eta Jose Ramon Iruretagoiena Izeta II.a ariko dira.
Herri kirolak amaitu eta gero, txikienek gehien gozatzen duten unea etorriko da: Gorritiren animalien saio berezia, pottoka, oilar eta zezen txikiekin. Eguna amaitzeko, arkume bat zozkatuko dute.
