Bizkaia Kirolak sarietarako hautagaiak aurkezteko epea zabaldu dute
Bizkaiko Foru Aldundiak apirilaren 15era arte bilduko ditu herritarren proposamenak. Edozein pertsona zein erakundek aurkez ditzazke hautagaiak, eta proposamen bat baino gehiago egiteko aukera dago.
kirol.zerbitzua@bizkaia,eus helbide elektronikora igorri behar dira proposamenak. Era berean, Aldundiaren Kirol Zerbitzuaren bulegoan ere utzi daitezke.
Bizkaian gorputz eta kirol alorreko jarduera bultzatzen eginiko lanetan nabarmendu diren pertsonen eta erakundeen aipamen berezia egiteko sariketa da honakoa. Aldunditik aurten ez dute kategoriarik zehaztu, eta horixe da 2016ko Bizkaia Kirol Sarien berrikuntza bakarra.
Hala ere, proposamenak aztertu ostean, sariak zeini eman erabakitzerakoan irizpide hauek kontuan hartuko dituzte: Emakumeak kirolean sustatu, ikusgarriago egin eta bultzatzea (arlo praktikoan nahiz kirol-kudeaketaren arloan), euskararen erabilera sustatzea kirolaren praktikan edota kudeaketan, kirol arloan kudeaketa aurreratuko sistemak eta metodoak aplikatzea, Herri Kirola sustatu, ikusgarriago egin eta bultzatzea (arlo praktikoan nahiz kirol-kudeaketaren arloan), eta bizkaitarrek kirol gehiago egin dezaten sustatzea.
2006tik kirolari eta kirol erakundeak saritzen
Bizkaiko Foru Aldundiko Kultura Saila orain dela hamar urte hasi zen Bizkaiko kirolari eta kirol erakundeak saritzen: “Bizitzaren alde handi bat nola edo hala kirolari eman izan diotenei ohorezko saria emateko helburuagaz sortu ziren”.
