Konpostaren eta bosgarren edukiontziaren inguruko tailerrak egin dituzte Ean

Organikoa biltzeko kanpainagaz bat egin dute herritar askok

Aintzina Monasterio

2015/12/15

Zapatuan, Eskolondon egin zuten 5.edukiontziaren inguruko tailerra.

Organikoa Ean lelopean abiatu zuten organikoa biltzeko kanpaina, eta dagoeneko martxan ipini dute. Aurreko hilabeteetan herritarrei informazioa ematen aritu ziren, eta aurreko bi asteburuetan tailerrak eman dituzte. Domekan, Natxitua auzoko bolatokian konpostari buruzko ikastaroa eman zuten, eta zapatuan, berriz, bosgarren edukiontziaren ingurukoan elkartu ziren Eskolondon herriguneko bizilagunak. Aurreko asteburuan, Bedarona auzoan eman zuten lehenengo tailerra, eta hura konpostaren ingurukoa izan zen. Izan ere, Natxitua eta Bedaronako landa eremuetan autokonposta eta auzokonposta bultzatzen ari dira, eta herrigunean bosgarren edukiontzia. Momentuz herritar nahikotxo animatu dira, baina, ahalik eta familia gehienek parte hartzea da udalaren nahia. Horregatik jakitera eman dutenez, gura duten herritarrak edonoiz apuntatu ahal dira, eta kanpainagaz bat egiteko gonbita luzatu diete eatarrei. Izena emateko nahiz informazioa jaso edo zalantzak argitzeko honako helbide elektronikoa dute: organikoaean@gmail.com. Halaber, udaletxera ere deitu dezakete: 646 275 227. Eako herrigunean 17 familiak eman dute izena bosgarren edukiontziaren erabilerarako. Bestalde, Natxitua eta Bedarona auzoetan 70 familiak erabiliko dute auzokonposta edo autokonposta. Hain zuzen ere, horietatik 40tan autokonposta egingo dute, eta 30ek auzokonposta egitea aukeratu dute. “Ikasiko dugu, hilabetean ez dugu %100ean ondo egingo baina, poliki-poliki joango gara egokitzen, jendeak pixkanaka-pixkanaka ikasiko du. Denboragaz ikasten da, eta ahalegindu behar gara”, zihoten zapatuko tailerrean parte hartu zuten eatarrek. Europako irizpideak Tailerra Ainhoa Lopez Inguru enpresako kideak eman zuen. Organikoaren bilketari buruzko informazioa eta azalpenak eman zituen, eta horrekin batera, gainontzeko birziklapen moten laburpena egin eta gaur egungo birziklapen tasak zein Europatik zehazten direnak azaldu zituen. Era berean, bertan bildutakoen zalantzak ere argitu zituen.

“Gaur egun sortzen dugun zaborraren %16a birziklatzen da, eta Europatik datozen irizpideek diotenez, 2020rako %50a birziklatu beharko genuke”, zehaztu zuen Lopezek. Europaren apustua hondakinen gaikako bilketa dela gogorarazi zien bertan bildutakoei. “5.edukiontzia edo kontenedore marroaia materia organikoa batzeko sistema da, eta Bizkaiko kasuan begetalak diren hondakinak bakarrik bota behar dira bertara”, azaldu zuen. Izan ere, Euskal Herriko zein Europako beste leku batzuetan, animali jatorrizko hondakinak ere biltzen dituzte, hau da, arrain zein haragi hondakinak ere erabiltzen dituzte konposta egiteko. Bizkaiko Foru Aldundiak 2011ko martxoan zabaldu zuen konpostegia, eta erabaki zuen bakarrik landare jatorriko hondakinak bota behar zirela bertara, eta animalitik datozenak ez botatzea erabaki zuten. “Haien arrazoia zen haragi hondakinek azidotasuna ematen ziotela konpostari, eta beraz, ez zela lortzen kalitate goreneko konposta”. Lopezek animali zein landare jatorriko hondakinekin konposta egiten dutenen adibideak eman zituen: Gipuzkoan, Nafarroan, Araban, Katalunian, Asturiasen, Kantabrian… “Teorian hondakin organiko dira naturalki deskponsatzen diren elikagai guztiak, hala ere, gure kasuan honako hondakinak batuko ditugu konposta egiteko: sukaldeko soberakinak, berdurak, frutak, haziak, fruitu lehorra, sukaldeko papera (beti ere oliorik ez badu), zerealak, ogia eta harengandik eratorritakoak, infusioen poltsak, kafe hondarrak, mukizapiak ( mukirik barik), lore zein landareen hostoak eta lurra….” Bestalde, birziklatu ezin daitezkeen zenbait hondakinen zerrenda ere egin zuen Lopezek: olioa, haragia, arraina, esnekiak, erratzarekin bildutako zaborra, arrautza oskolak… “Europatik datozen irizpide guztiak bi hondakin motak aipatzen dituzte, beraz, hemen ere heldu beharko gara horretara”, zehaztu zuen. Edukiontzi marroia Edukiontzi marroiak asteon helduko dira Eara, konposterak, berriz, dagoeneko bertan dituzte. Bosgarren edukiontziaren erabiltzaile izango direnei zapatuan banatu zizkieten ontzi txikiak eta bio-poltsak (biodegradagarriak direnak). Etxean horietan bilduko dute zabor organikoa eta beteta dagoenean, edukiontzi marroian hustuko dute. Familia bakoitzari giltz bana banatu zaie edukiontzi marroiak zabaltzeko. Horrela, bestelako hondakinik ez egotea bermatu gura du udalak. Edukiontzi marroiak gainontzekoak dauden lekuetan egongo dira. Halaber, frontoi atzealdean eta Jesusen elizaren atzealdean auzokonpostagailu bana ipiniko dute.