Txistu doinupean rap-a abestu du Iñigo Iriondok XIV. Txistu Alardean

Olaia Zabalondo

2015/06/16

Iñigo Iriondo rap abeslari bermeotarra Txistu Alardean

Txistuaren doinuak eta rap musika estiloa uztartu dituzte lehenengoz, hamalaugarren urtez, Bermeoko Udalaren Musika Eskolak antolatu duen Txistu Alardean. Aurtengo alardea «oso ondo» joan dela esan du Esti Arrizabalaga Musika Eskolako zuzendariak. Iaz baino jende gehiago bertaratu zen Artza frontoira, «eta guztiek esan zuten oso polita izan zela». Jendeak gustoko izaten duen arren, «hurreratzea kostatu egiten dela» dio Arrizabalagak. Gatom Taldeko Iñigo Iriondo rap abeslari bermeotarra izan da gonbidatua eta hiru abesti aukeratu dituzte txistu doinupean abesteko: Duintasun martxak, Especie de extincion eta Euskalakari. Arrizabalagak azaldu duenez, Iñigo «gustora» eta «pozik» geratu da egindakoarekin, bai eta publikoa ere: «formatura oso ondo egokitu zen eta jendeari gustatu zitzaion. Jendearen parte hartzea lortu eta txaloka ere jarri zuen publikoa Euskalakari abestiagaz». Dantzarako tartea ere izan zuten. Alkartasuna Dantza Taldekoek fandangoa, arin-arina eta banako bat egin zituzten, besteren artean. Javier Setien dantza eskolakoek, bestalde, tangoa eta pasodoblea dantzatu zituzten. Udalaren Musika Eskolako txistulariak, koruak eta musikariak, Bizkaiko Musika Eskolako txistulariak eta Kankinkabara txistu taldea, Ondarroako Metal taldeak, txalapartariak eta irrintzilariak ere parte hartu zuten XIV. Txistu Alardean. 60 musikari eta dantzari inguru izan ziren agertokian. Argakiak Bermeoko Udalarenak dira: