Bakearen doinuen laugarren edizioak musika eta dantza uztartu ditu, berriro
Zapatu iluntzean eman zuten kontzertu berezia, Gernika-Lumoko Jai Alai pilotalekuan. 500 parte hartzaile baino gehiago, doinu eta erritmo ezberdinetara. Aurrean, jendez betetako harmailak. Ume, gazte zein nagusi… Instrumentoarekin, kantuan edota dantzan… Hunkigarriak izan ziren, bereziki, Segundo Olaetako umeek eta bandak Ken Zazpiren ‘Gernika’ kantatu zutenean, Ross dantza eskolakoen performanceak lagunduta. Eta hunkigarria, baita, abesbatzek eta bandak eskaini zutenPablo Sorozabalen ‘Gernika’.
Elai-Alai dantzari taldeak ere bere pausoak jarri zizkion zenbait piezari, eta Andra Mari koralarekin batera izan dira, aurten, Zornotzako eta Ondarroako abesbatzak.
Sorpresak ere izan dira; besteak beste, musika eskolakoek Gatiburen Zeu,zeu,zeu! abestia interpretatzerakoan. Alex Sardui eta Haimar Arejitaren laguntza izan zuten abesti horretan.
