25 bat urte beranduago ere, euskal dantzan

Musika barik dantzarik ez dagoelako, eta dantzarik barik musika gauza bera ez delako, Gazteak taldearen eta Segundo Olaetako musikarien laguntzagaz, dantza egitera atera dira Gernika-Lumon.

Izaro Mendieta

Gernika-Lumo

2015/04/22

Eskolarteko Dantzari Eguna 2015. Argazkilaria: Gernika-Lumoko Udala

Eguraldia lagun izan zuten domekan, eta, beraz, Gernika-Lumoko Merkatu plazan barik, Urbieta zelaian bildu ziren; guztira, 1.400 bat dantzari eta hainbat bisitari. Eskolarteko Dantzari Eguna ospatzeko hitzordua zuten, eta hutsik egin barik, hala elkartu ziren. Alkondara zuria eta mahonezko prakak edota gona soinean, ekitaldiari ekin zioten. Neska zein mutil, ume eta gaztetxo, Pasealekuan batu ziren lehenengoz, kalejira egiteko. Hala, elkarri eskua emanda egin zituzten bertatik Urbietarainoko metroak. Eta behin futbol zelaian, tadeka banatuta parte hartu zuten 2015eko Eskolarteko Dantzari Egunean. Herriko ikastetxe eta ikastola guztietako –Allende Salazar, Barrutia, Mertzede, San Fidel eta Seber Altube– ikasleak ziren bertan, noiz dantzatuko zain. Eta gehiagorik itxaron barik, hankak eta eskuak mugitzeari ekin zioten, bertoko dantzen bitartez. Hala, besteak beste, Dantzari dantza (agintariena, banango, ezpata joko txikia, txotxongilo), Makil jokoa I, makil jokoa II, txulalai, zapatain dantza, San Petrike, Gipuzkoako makil txiki, euzko dantza, arku-dantza eta zinta dantza dantzatu zituzten. Bukatzeko, Benafarroako martxagaz agurtu ziren Gernika-Lumoko ikasleak. 25 bat urtean eutsi diote ohitura bilakatutako egun horri, eta, aurrerantzean ere, hala jarraituko dutela dirudi. Bitartean, dantzaz gozatzen jarraituko dute, eta, era berean, euskaraz hazten ere. Izan ere, Eskolarteko Dantzari Egunaren egitasmoa Euskara Normalizatzeko Plan Estrategikoetan aintzat hartzen dute irakaskuntza esparruan. Gizarteratzea euskaraz Azken finean, aipatu egun horren antolatzaileen asmoa «umeen gizarteratzea euskaraz gauzatzea da, ekitaldi erraldoi eta unkigarria bitarteko». Hala, horren bidez, euskal ohiturak eta psikomotrizitatea lantzea, umeen arteko harremanak bideratzea, eta familia giroko ekitaldietan hizkuntza ohiturak gauzatzea lortzen dute parte hartzaileek.

25 bat urte beranduago ere, euskal dantzan

Bizkaia

Barakaldon desagertutako 77 urteko gizon baten bila ari dira

Elkarbizitzan oinarritutako etorkizun bat aldarrikatu dute ehunka lagunek Bilbon

Bilboko Aste Nagusiko seigarren egunean gizon bat atxilotu dute indarkeria matxistagatik

Bi gizon atxilotu dituzte Bilboko Aste Nagusiko bosgarren egunean indarkeria matxistagatik

Teknikarien greba «arrakastatsua» dela eta, 48 bat jarduera bertan behera utzi dituzte Bilboko Aste Nagusian

Bilboko Aste Nagusiko laugarren egunean bi lagun atxilotu dituzte sexu ukituak egitea leporatuta

Irailaren 13ko mobilizaziora deitzeko agerraldia egin du Ernaik Bizkaiko Gazte Egunean

Gernikako Udalak gaztetxean egin nahi dituen obrak geldiarazi ditu Egurre gazte asanbladak

Jatabeko Udalak salatu du bentonita bota dutela Gatika eta Cubnezais lotzeko interkonexio elektrikoaren lanetan