Afrika, neolitikotik XX. mendera
Otsailaren 27ra bitartean egongo da ikusgai Gernika-Lumoko Kultur Etxean Bilboko Kalao galeriak ekarritako artelanen lagina.Afrikako arte plastikora hurbiltzen duten artelanak; Afrikako sorkuntza kulturalaren lekuko; kontinente hartako artisten ikuspe...
Otsailaren 27ra bitartean egongo da ikusgai Gernika-Lumoko Kultur Etxean Bilboko Kalao galeriak ekarritako artelanen lagina.
Afrikako arte plastikora hurbiltzen duten artelanak; Afrikako sorkuntza kulturalaren lekuko; kontinente hartako artisten ikuspegiak, eta ikuspuntuak historian. Afrikako plastika bertatik bertara du goiburu otsailaren 27a bitartean Gernika-Lumoko Kultur Etxean ikusgai izango den erakusketak. Izenburuak berak dioenez, Afrikako artea izango da herritarrak erakusketa gelan aurkituko duena. Eskulturak, margoak, liburuak, idatziak eta ikus-entzunezkoak.Bilboko Kalao Panafrican Creations galeriarena da lagina, eta Neolitiko garatik gaur egunera arteko artelanak dira Gernika-Lumora ekarri dituztenak. Afrikako sorkuntza plastikora hurbiltzeko artelanen bildumaren lehenengo zatia dela diote. Errituen isla diren eskulturak ikus daitezke Gernika-Lumoko Kultur Etxean, baina, bai eta ere arte garaikidearen adibide diren obrak.
Artelanak eta dokumentala
XX. mendeko 50eko eta 70eko hamarkaden artean egindako lanekin batera, beraz, antzinakoak nahasten dira erakusketan. Argeliako, Burkina Fasoko, Nigeriako, Guineako, Maliko, Tanzaniako, Hegoafrikako eta beste hainbat herrialdetako artisten lanak bildu dituzte, neolitiko garaitik independentzia garaietara arte doazen kulturak eta gizarte ereduak batuz.
Besteak beste, George Lilanga, D.B.K. Msagula, Charles Sekano, Esther Mahlangu edota Seyni Awa Camara artisten obrak dira Gernika-Lumon erakusgai ipini dituztenak. Guztira, 28 pieza eta bideo bat dira, hain zuzen, bisitariaren eskura daudenak.
Bideo-dokumentala, hain zuzen, Seyni Awa Camara artista senegaldarrari buruz 2010. urtean kaleratu zen lana da: Seyni Camara entre los elementos. Senegalgo arte sorkuntza garaikideari buruz grabatu izan den dokumentalik osotuenetakoa da berau; beraz, artea ulertzeko lagungarri den ikus-entzunezkoa ere bada.
Afrikako artea da Bilboko Kalao galeriak lantzen eta erakusten duena, eta, hain zuzen, galeria horren laguntzarekin antolatu du Gernika-Lumoko Kultur Etxeak joan den barikuan inauguratu eta orain ikusgai duen erakusketa.
