Han izan dira gaur Jon Darpon Osasun sailburua, Osakidetzako zuzendari nagusi Jon Etxeberria eta Barrualde-Galdakao ESIko zuzendari Jon Guajardo, instalazioak bisitatzen. Hain zuzen, bi ebakuntza gela izango dira erabilgarri aurrerantzean; eta, hasiera batean, kirurjia oftalmologikoa eta traumatologikoa egingo dituzte. Endoskopiak egiteko gela, anestesia ostean bizkortzeko unitatea eta kirurjia anbulatoriorako unitatea ere zabalduko dituzte.
Urtean traumatologiako 400 ebakuntza kirurjiko, oftalmologiako 600 eta 750 proba endoskopiko egingo dituztela aurreikusi dute.
Guztira, Gernika-Lumoko ospitalean 2.150.000 euroko inbertsioa egin dutela azaldu du Jon Darpon sailburuak, eta Osakidetza kalitatezko zerbitzu publikoa izateko konpromisoa berretsi du Etxeberriak. “Orain nabarmen hobetuko du Lea-Artibai eta Busturialdeko herritarrentzako osasun arreta. Gainera, erreferente izateko baliabideak jartzen ari da”.
Jon Darponek esan duenez, Urkulluren gobernuak pertsonei eman nahi die lehentasuna, eta Osakidetza ere lehentasuna da Jaurlaritzarentzat. “Hori dela eta, ez dugu zerbitzu bat bera ere kenduko”. Lanpostu publikoen aldeko apustua egingo dutela esan du Osasun sailburuak. “Gernika-Lumoko ospitaleak 56.000 pertsonari ematen die zerbitzua, eta instalazio berriek herritarren zerbitzu klinikoa hobetuko du, itxaron-zerrendak murriztuz”.
Hurrengo astean aurkeztuko ditu Jaurlaritzak 2015erako aurrekontu orokorrak Legebiltzarrean, eta aurrekontu horiek “izaera soziala” izango dutela esan du Darponek. “Osakidetzari dagokion partida handitu egingo da, eta langilegora zein inbertsioetara bideratuko dugu, beharrezkoa dugulako”. Lan baldintzak hobetzeko lan egiten dutela aipatu du Osasun sailburuak, eta Enplegu Publikorako bi deialdi iragarri ditu 2015eko martxora bitartean. “Ia 1000 lanpostu sortuko ditugu”. Hori dela eta, sindikatuek sortu nahi duten “arrazoitu gabeko ezinegona” ulertezina zaiola esan du.
Sindikatuek diotenez, baina, ez dira 1000 lanpostu sortuko. Galdakaoko ESI Barrualdeko delegatu Latxe Urangak azaldu duenez, lanpostu librerako 474 plaza aterako dituzte, eta bikoitza barne promoziorako. “Hala ere, deialdi honetan, barne promoziorako bete gabe geratuko diren plazak ez dituzte lanpostu libreak gehituko; beraz, hutsik geratzen diren lanpostuak galdu egingo dira”.
Osakidetzako arduradunek diotenaren aurka, 2012ko abenduan zabaldu zutenetik, Gernika-Lumoko ospitaleak gabezia handiak dituela esan du Urangak: “Osakidetza Sareko eskualdeko ospitale baten planteamendua egin zuten, baina urtebete esperoan egin ostean, hobetu beharrean egoerak okerrera egin du”. Pediatria zerbiitzurik ez duela esan du, larrialdi zerbitzuetako medikuek zituzten akordio batzuk atzera bota dituzte, administrari laguntzaile bakarrak egin behar duela lan guztia, eta kanpo zerbitzuetan ere egoera antzerakoa dela. “Orain kanpo zerbitzuetako administrari horrek hartu beharko du kirurjia zerbitzuak sortzen duen lana”. Lan karga handitu egin dela dio delegatuak, “baina proposamen egokirik eta errealik ez dute eman”. Hori dela eta, protesta egin dute gaur goizean Gernika-Lumoko ospitalearen aurrean, eta azarorako eta abendurako ere mobilizazioak iragarri dituzte.
Sindikatuen protesta, kanpoaldean
ELA sindikatuak ere, ospitaleak dituen gabeziak salatu ditu aste honetan, Gernika-Lumokoa ospitalea barik, anbulatorio handi bat dela esanez.
Gernika-Lumoko ospitalean oheak jartzearen alde dagoen plataformako kide Camino Saizek, bestalde, benetazko eskualdeko ospitale bat exijitu du. “2007. urtean Osasun sailburu zen Gabriel Inclanek aurkeztu zuen proiektua ospitale legez, eta 70 ohe aurreikusten zituen”. Eta agindutakoa betetzeko eskatu du Saizek: “Ospitaleak oheak izan ditzala eskatzen dugu, ebakuntza baten ostean arazo ez-larria duten gaixoek ingresatuta geratu ahal izateko, Galdakaora joan beharrik ez izateko”. Era berean, hemodialisi zerbitzua ere eskatu du. “Ospitaleak zerbitzu hori emango zuelaren konpromisoa hartu zuten. Bizkaian itunpeko bi zerbitzu ditu Osakidetzak hemodialisia egiteko; beraz, pribatuak diren horiek kentzeko eta zerbiztua Gernika-Lumoko ospitalean emateko eskatu nahi diogu”.
Orokorrean osasun zentroaren langilegoa indartu beharko luketela uste du, eta larrialdi zerbitzuetan dituzten gabeziak ere kritikatu du plataformako kideak: “Pediatria zerbitzua izan arren, pediatrarik ez dago; eta, gutxienez, txanda bakoitzeko pediatra bat jartzeko eskatzen dugu”.
Busturialdeko albisteak euskaraz, libre eta kalitatez jaso nahi dituzu? Horretarako zure babesa ezinbestekoa dugu. Egin zaitez HITZAkide! Zure ekarpenari esker, euskaratik eginda dagoen tokiko informazio profesionala garatzen eta indartzen lagunduko duzu.
Tokiko informazioa profesionaltasunez eta euskaratik, modu librean kontatzea da gure eginkizuna. Horretarako zure ekarpena beharrezkoa da, eta ongi maitatzeko modurik zintzoena da HITZAkide egitea.
Ezagutu HITZAkide izatearen abantailak eta aukeratu HITZAkide izateko gustuko modalitatea.
Tokiko informazioa profesionaltasunez eta euskaratik, modu librean kontatzea da gure eginkizuna. Horretarako zure ekarpena beharrezkoa da, eta ongi maitatzeko modurik zintzoena da HITZAkide egitea.
