Juan Carlos Goienetxea eta Idurre Bideguren
“Erantzunkizunez eta koherentzia politikoz” jokatu du Goienetxeak bere dimisioa aurkezterakoan, eta argi utzi du bere kontzientzia “garbi” duela. Hala, udal gobernuari, Bilduko kideei eta beragaz urte guzti horietan egon diren guztiei eskerrak emanez agur esan dio 16 urte alkate eta ia beste 12 urte zinegotzi legez aritutako ibilbide politikoari.
Ustez prebarikazio delitua egitearren, deklaratzera deitu du epaileak Juan Carlos Goienetxea, San Migel auzoko auzian inputatu legez. Orain, bere burua defendatu beharko du, baina hori Bermeoko Udaletik kanpo egitea erabaki du; hartara, “bai udal gobernuari zein koalizioari min gutxiago” egingo diolakoan. Udaletik kanpo, gainera, askatasun gehiagoz bideratu eta borrokatuko duela bere defentsa ziurtatu du.
Bermeoko San Migel auzoko lurzoru batzuen birkalifikazioan du oinarri prozesu guzti horrek. 2008. urtean, Bermeoko bizilagun batek bere lurrak hiri-lur bezala kalifikatzeko eskaera egin zion Bermeoko Udalari (EAJ zegoen orduan udal gobernuan), baina azken horrek ezeztatu egin zion. Garai hartan, Hiri Antolamendurako Plan Orokorra diseinatzen zebilen udala. 2009an, berriz, behin-behineko HAPOa proposatu eta onartu zuen udal gobernuak, EAren kontrako botoekin. Plan Orokor horrek aipatu bizilagunaren lurren aldamenekoak eraikitzeko lur bezala kalifikatzea biltzen zuen. Hala, behin-behineko onarpen horren ostean, Eusko Jaurlaritzaren Etxebizitza Sailaren eta Euskal Herriko Lurralde Antolakuntzaren Batzordearen oniritzia jaso zuen plan orokorrak, eta, hala, 2011n behin betiko onartu zuen osoko bilkurak aho batez (Bildu agintaldian zegoela).
Herritarra, desados
Gauzak horrela, 2013. urtean, etxebizitza bat eraikitzeko lizentzia eskatu zuen enpresa eraikitzaile batek, eta udalak onartu egin zuen bere eskaera. 16 etxebizitza egitea aurreikusten zuen enpresak aurkeztutako proiektuak; 6 etxebizitza tasatu, eta gainontzeko 10 etxebizitza librekoak. 2008. urtean bere lurrak hiri-lur bezala kalifikatzeko eskaera egiten duen herritarra desados agertzen da horren guztiaren aurrean, eta epaitegietara jotzen du irtenbide bila.
Hala, administrazioarekiko auzien prozesua martxan jartzen dute, Bermeoko Udalak prozedura administratiboan zerbait gaizki egin ote duen argitzeko. Eta administrazioarekiko auzietako epaileak dio San Miguel Auzoko lurzoru hori eraikitzeko lurra dela, hiri-lurra beharrean (Hiri Antolamendurako Plan Orokorrean aurreikusten den bezala). Erabaki horren aurrean eta gune hori hiri-lurra dela iritzita, Bermeoko Udalak kasazio helegitea jartzea erabaki zuen.
Udal gobernuak eta koalizioak babesa eman dio Goienetxeari
Epaileak udalaren errekurtsoa aztertzen duen bitartean, salaketa jarritako herritarrak etxebizitza horien lanak eteteko eskatu du. Hala ere, epaileak dio lan horiek ez gelditzeko; azken finean, lurzoru horiek hiri-lur zein eraikitzeko lur izan arren, etxeak eraikin eraikin daitezkeelako kasu batean zein bestean.
Zigor-arloko epaitegian
Dena den, salaketa jarritako herritar horrek administrazioarekiko auzien epaitegira ez ezik, zigor-arloko epaitegietara ere jo du, udalari erantzunkizun politikoa eskatuz. Zigor arloko bide horretan, eta oraindik gai hori aztertu eta landu egin behar duela aitortuta, prebarikazio delitua egin duelakoan deklaratzera deitu du epaileak Goienetxea eta beragaz batera, Tomas Tardio (eraikitzailea). Halaber, eraikitzen hasi diren etxebizitza horien eraistea ere eskatzen du zigor-arloko epaile horrek.
Gauzak horrela, azken epaile horrek eta administrazioarekiko auzien epaitegiko epaileak dioena guztiz “kontrajarriak” direla adierazi du Bermeoko alkate Idurre Bidegurenek. Gainera, dio epaileak ustez ikusitako prebarikazio zantzuak 2008 eta 2009 urteetakoak direla; “alegia, Juan Carlos Goeienetxea ez zenean ez alkate ez Hirigintzako zinegotzi”. Hori dela eta, udal gobernuak ez duela epailearen autoa ulertzen azaldu du.
Goienetxeak, bere aldetik, azaldu du Bildu ez zela 2008 eta 2009 urteetan oraindik existitzen; hori horrela, orduko hartan hartutako erabakietan ez zuela parterik hartu argi utzi gura izan du: “Behin betiko HAPO onartzerakoan soilik hartu du parte, baina hori Eusko Jaurlaritzaren baimenagaz iritsi zen udalera”.
Epailearen autoaren aurkako errekurtsoa
Horregatik, Bermeoko Udal Gobernuak Gernika-Lumoko 2 zenbakiko Instrukzio Epaitegiko epailearen autoaren kontrako errekurtsoa aurkeztu duela jakinarazi du egungo alkateak.
Bestalde, Bermeoko udal gobernuak argi du “Goienetxearen, udal gobernuaren eta Bilduren aurkako kanpaina mediatiko eta politiko bat” dela; alegia, ez dela “nork bere interesak defendatzearen maniobra hutsa”. Gainera, salaketa jarritako herritar horrek eta EAJk interes amankomunak dituztela gaineratu du. Azken finean, jeltzaleek “eskuak garbitu” dituztela eta beraien erantzunkizunak bere gain hartu ez dituela salatu du Bidegurenek; “izan ere, EAJk ondo daki epaileak autoan ikertzen dituen erabaki urabanistikoak 2008 eta 2009an alderdi jeltzaleak hartutakoak direla”. Horregatik, uste du EAJren jokabidea “iraingarria eta lotsagarria” dela. “Eurak dira gu baino informazio gehiago dutenak; eurak dakite zergatik erabaki zen erabaki zena, zergatik onartu zen onartu zena, zergatik bultzatu duten bultzatu dutena…, eta hala eta guztiz ere, ez dute ezer esaten; ez, behintzat, udalean ezta bertoko batzordeetan”.
Guzti horren aurrean, Bermeoko alkate Idurre Bidegurenek udal gobernuaren kudeaketa “ona” defendatu du, eta udal gobernu osoagaz batera, babesa eman diote Goienetxeari. Haren erabakia, gainera, “penaz eta inpotentziaz” hartu dutela aitortu dute. Hala, alkate izandakoaren jarrera “gizartean sarriagotan ikusi beharko litzatekeen jarrera” dela nabarmendu du egungo alkateak; alegia, “eredugarria”. Eta bera gabe, taldea “herren” geratzen dela adierazi du. Jarrera horrekiko “harrotasuna” erakutsiz, eskertu egin du taldeak Goienetxea eta bere “eskuzabaltasuna”.
Era berean, Goienetxearen dimisioaren aurrean, 2008 eta 2009 urteetan erabakiak hartu zituztenek beraien ardurak ere har ditzatela eskatu du Bermeoko udal gobernuak.
Bermeoko EAJ, harrituta
Bermeoko EAJk, bestalde, “harrituta” hartu du Bilduk epailearen erabakiaren aurrean erakutsitako jarrera. Eta, era berean, azaldu du, ez dituela zalantzan jarriko Goienetxea prebarikazio delitua leporatzeko epailearen erabakiak. Bestetik, argi utzi nahi izan du aipatu herritarrak salaketa jarri zuela jakitean, jeltzaleak bai osoko bilkuretan, bai udaleko batzordeetan zein udaleko arlo ezberdinetan etxeak eraikitzeko lizentzia ematearen aurka agertu izan direla behin eta berriz. “Bilduk, bestalde, arduragabekeriaz aurrera egitea erabaki du, beste behin ere, herriari eragin ahal dieten erabakiak hartuz”. Hala ere, jeltzaleek azaldu dute ez dutela Goienetxea deklaratzera deitu duten prozesu judizial hori oztopatuko.
Goienetxeak hasiera batean 2015eko urtarrilean joan beharko luke epailearen aurrean deklaratzera; hala ere, deklarazio eguna aurreratzea eskatuko duela jakinarazi du, “guzti hau ahalik eta azkarren argitzeko eta batzuek dituzten susmoekin lehenbailehen bukatzeko”. Izan ere, aitortu duenez, “min handia” egiten ari zaizkie bai berari eta baita bere taldeari ere.
