Andramari parte hartzaileak izan dira aurtengoak, Bermeoko Udalaren arabera
Andra Mari eta Santa Eufemia jaien balorazioa egin du Bermeoko Udalak, eta azaldu duenez, «herritarren parte hartzeagaz, giro onean» igaro zituzten herriko festak irailean. Hala, garbitasunaren zerbitzuak indartu izanak, «herria garbi egotea» ahalbidetu zuela adierazi du. Izan ere, giztira, 664.000 litro ur erabili ditu; iaz baino gehiago, alegia. Hala, beste urte batez, positibotzat jo ditu herriko jaiak Bermeoko Udalak.
Gaur goizean eman dute Aingeru Astui kultura zeingotziak eta Juan Karlos Agirre Zerbitzuetako zinegotziak Bermeoko jaien balorazioaren berri, eta horiek antolatzen ibiltzen diren elkarte, erakunde zein norbanakoen ibilbidea nabarmendu dute: «parte hartzen duten guztien arteko koordinazioa urtez urtez hobetzen doa; dena den, hobetzen jarraitu beharra dago». Horrekin batera, eta eguraldia lagun, egitarauan zehaztutako ekintza danak (irailaren 16ko suziriak izan ezik) egin zirela azpimarratu dute. Horietan, gainera, herritarren inplikazioa «garrantzitsua» izan zela adierazi dute.
Gauzak horrela, jaiak «oso ondo» igaro zituztela aitortu du udalak; «nahiz eta gaueko giroa eskastu den». Azpimarratzeko ekimen eta egunen artean, esaterako, txupina jaurtitako momentua edota arrantzale eguneko giroa nabarmendu ditu udalak. Era berean, galaradun baporetan bizitza galdu zutenei, itsasoan bizia salbatu dutenei edota Gaztelugatxeko San Juaneko zaintzaileei egindako omenaldia ere «hunkigarria» izan zen, Astuiren eta Agirreren arabera.
Jende asko ekintzetan
Hala, txosnetako ekintzetan, elektrotxarangan, musika taldeen kontzertuetan, Sukalki Egunean, oiloen erakusketan, baserri giroko azokan, umeentzako ekintzetan, danborradan eta beste hainbatetan jende asko batu dela adierazi dute.
Sastar-batze zerbitzuak, bestalde, izan du bere eragina; irailaren 9an izan ezik, gainontzeko egun denetan eman baitiote zerbitzu herritarrei jaietan, iaz baino 4.800 kilo sastar gehiago batuta: alegia, 140.350 kilo, guztira.
Era berean, barraketakoek, salmenta postu jartzaileek zein txosnetakoek garbitasunarekiko erakutsitako «jarrera ona» txalotu du udalak. Eta jakinarazi du urtero baino ekintza bandaliko gutxiago egin dituztela, nahiz eta kalte batzuk izan diren komun publikoetan eta sastar-ontzi batzuetan».
Azkenik, Bermeoko Herri Babeseko kideek emandako laguntza eta babesa eskertu die.
