Ia 270 bat lagunek egingo dute Izaro eta Bermeo arteko zeharkaldia

Busturialdeko Hitza

Busturialdea

2014/09/03

Gaur goizeko aurkezpena.

Bigarren urtez jarraian egingo dute Salome Campos zeharkaldia zapatuan Bermeon. Guztira, 5.000 metro egin beharko dituzte, eta zeharkaldia antolatzeaz arduratu den Fortuna Elkarteko kide Aitor Burgoak aurreratu duenez, parte hartzeko ez ezik, ikusteko ere «oso polita» izango da. Iaz ere, giro ezinhobea sortu zela gogoratu du gaur goizean lasterketa aurkezteko ekitaldian. Lasterketa berezia ere badela azaldu du Burgoak; izan ere, «kostaldean ez da 5.000 metroko lasterketarik egiten, bertokoak 3.000 ingurukoak izaten baitira». Distantzia hori egiteko ausardiarik ez duenak, dena den, 1.500 metroko zeharkaldian parte hartzeko aukera izango du zapatuan. Halaber, 2000 eta 2003 urteen artean jaiotako umeek ere izango dute igerian lehiatzeko aukera, 500 metro eginez. Parte hartzaileen zerrenda erreparatuta, bestalde, izen emateen ia %70a gizonezkoak direla azaldu du; horregatik, emakumeei parte hartzeko deia luzatu die. 11:00etan, lehenak Antolatzaileek azaldu bezala, 11:00etan emango diote hasiera itsasoko lasterketari; ordu horretan aterako dira parte harztaile gazteenak eta 12:00etan hasiko dute, berriz, 5.000 metroko zeharkaldia. Horiek lasterketa bukatzen duten bitartean aterako dira gainontzekoak, alegia, 1.500 metro egin beharko dituztenak. Hala, azken igerilariak portura ailegatzean ekingo diote sari banaketari: maila bakoitzeko emakume eta gizonezko irabazle bakoitzak txapela eskuratuko du, eta, horrez gain, hegaluzea ere jasoko du sari modura. Halaber, beste hainbat sari ere emango dituztela aipatu dute antolatzaileek.