Jarraipena bermatzeko bidean

Busturialdeko Hitza

Busturialdea

2014/06/13

Orain dela bost urte Arratzuko Arrolape Mendi Kirol Elkartearen izenean antolatu zuten Arratzu-Urdaibai Mendi Lasterketa. «Horrelako kirol ekintzak talderen baten izenean antolatu behar dira eta horrela sortu zen Arrolape», azaldu du Oskar Morales kirolariak. Gaur egun Arrolape Mendi taldeko kide da, Aitor Uriarte, Imanol Goñi eta Joanes Goitisolorekin batera. Bat-batean jaiotako elkartea, baina, apurka-apurka hasten joan den proiektu «handi bat» da orain. Izan ere, bazkide gutxi batzuek osatzen zuten elkartea hasierako urteetan. Orain, baina, 85 bat kide dira. «Azkenaldian denbora gutxian lagun asko federatu da eta hori poztekoa da. Adin desberdinetako talde giroa sortu eta harremanak sendotu ditugu denon artean», azaldu du Uriartek. «Duela urte batzuk inguruko eta Euskal Herriko mendi lasterketa eta martxetan hemengo hainbat kirolari batzen ginen», dio Moralesek. Horrek zer pentsatua eman zien euretako batzuei: «lasterketetan aritzen ginen batzuk elkarteren bat sortzeko edo zegoen batean batzeko beharra ikusi genuen». Haien zaletasunaren inguruko ideiak eta proposamenak eztabaidatu eta partekatzeko guneren baten falta ikusten zuten. Eta horregatik, Arrolapen sartzea erabaki zuten, eta denen artean gustuko duten proiektuari «itxura edo forma» ematen dabiltza.

Astran batzen dira astero. Kideen berbetan talde «dinamikoa» sortu dute denen artean eta hainbat lan taldetan antolatuta banatzen dituzte zereginak. Arrolapeko kideen helburu nagusia taldearen jarraipena bermatzea da. «Sortu denaren jarraipena,gogoen jarraipena, emaitzen jarraipena, dugun giro ezinhobe honen jarraipena», esan du Uriartek.

Talde gaztea eta hasiberria da, eta kideek diotenez helburua ez da ehundaka mendizalez osaturiko taldea sortzea. «Horrela balitz dugun esentzia galduko genukeen susmoa daukagu. Kirol maila eta adin desberdinez osaturiko lagun talde bat izateaz harro gaude, eta hemendik aurrera ere sentsazio, sentimendu eta pentsaera berdina izan nahiko genuke».

Lasterketetan lehiatzen diren korrikalarien eta martxetara doazen oinezkoen kopuruan gorakada nabaritu da azken urteetan. Joanes Goitisoloren berbetan, «urtetik urtera jende gehigok hartzen du parte, eta eskertzekoa da zaletasun hau hedatzen joatea».

Zaletasuna baino gehiago da eurentzat mendia eta aurten beste pauso bat eman dute. Campos Kontserbek babestutako Busturialdeko Mendi Lasterketen Teknifikazio Eskola sortu dute. 18 eta 23 urte bitarteko gazteei kirol honetan murgiltzeko aholkularitza eta jarraipen egokia ematen diete. Mendi lasterketen ezaugarriak, entrenamenduak eta beste hainbat ezagutza landuz. «Hasiberrietan nahiz maila aurreratuagoetan talde lanaren eta laguntasunaren ezinbesteko baloreak transmititzen dizkiegu, bakarkako kirola izanagatik ere horiek funtsezkoak direlako», zehaztu dute laurek. Euskal Herrian aintzindaria den formakuntza eskola da. Herrialde Katalanetan, esaterako, badituzte antzekoak.

Bestalde, aurten ere Urdaibai Kopa antolatu dute .«Sailkapen orokorreko txapeldun izateko hautagai nahikoa gaude, eta lehia estua dago gizonezkoetan zein emakumezkoetan», azaldu du Imanoñ Goñik. Txapelketa bost lasterketen osatzen dute eta horietatik lau lehiatu dituzte dagoeneko. Bosgarrena irailaren 17an egingo dute Foruan. Orduan jakingo da zein den aurtengo txapelduna.