Hainbat esku batu dira Bermeon eta Gernika-Lumon, erabakitzeko eskubidearen alde

http://youtu.be/_7lKPSG8IHA

Busturialdeko Hitza

Busturialdea

2014/03/24

Gernika-Lumoko ekitaldia

Herri bateko eta besteko Gure Esku Dago dinamikek egindako deialdiei jarraiki, hainbat lagun atera dira kalera asteburuan erabakitzeko eskubidearen alde. Bermeon zapatuan egin zuten egun osoko jaia, eta goizean goiz hasi ziren erabakitzeko eskubidearen aldeko mezua festa giroan gizarteratzen. Gernika-Lumon, aldiz, giza kate erraldoia osatu zuten hainbat lagunek domekan, eguraldi txarra aitzakia ez dela erakutsita. Poteo bategaz hasi zuten Bermeon jaieguna, 12:30ean, eta, trikitilarien, erraldoien eta Kankinkabarako txistularien laguntzagaz, alde zaharrera, portu ingurura eta Lamerara eroango dute bermeotarrek erabakitzeko eskubidearen aldeko aldarria. Ostean, Kafe Antzokian bildu ziren bazkaritan, giro ezin hobean. Gatom, Galarren eta Zona Cero taldeen kontzertuagaz amaitu zuten eguna. Gernika-Lumon, bestalde, Pasealekuan egitekoak ziren ekitaldiak, baina eguraldi txarra iragarrita zegoela eta, Merkatu plazara eroan zuten domeka goizeko egitaraua. Sokatiran, herri kiroletan, jolasean… aritu ziren goizean zehar, eta eguerdian egin zuten giza katea. Euriteak ez ziren izan etxean geratzeko aitzakia, eta bat beharrean, bi giza kate eratu zituzten Gernika-Lumon: Merkatu plazatik Errenteria auzorantz lehenengoa, eta Merkatu plazatik herrigunerantz bigarrena. Ostean, berriro Merkatu plazan bilduta, argazki erraldoia atera zuten parte hartzaileek, eskuak goian zituztela. http://youtu.be/_7lKPSG8IHA