Ibilaldiko bideokliparen grabaketaren momentu bat
Bizkaiko Ikastolen aldeko jai handia antolatzen ari den elkarteak Ibilaldiko ibilbidea ezagutaraziko du, domekan. Hain zuzen, Seber Altube Ikastolako Ingurumen Astearen barruan egingo dute aurkezpena, txango berezi bategaz. Antolatzaileek azaldu dutenez, “ibilbidea herriratzea, eta ibilbidean zehar dagoen natur zein kultur ondarea ezagutzera ematea dira txangoaren helburuak”. Hala ederto pasatzeko aukera ederra dela iritzita, parte hartzeko deia egin diete eskualdeko herritar guztiei. “Euskararen Bihozferako ondarea ez delako inorena, eta, aldi berean, guztiona delako”.
Parte hartzaileek 09:30ean hasiko dute txangoa, Pasealekuan. Helmuga, bestalde, Lurgorri auzoan izango dute. Bertan zenbait zuhaitz txiki landatuko dituzte bildutakoek, 11:30ak aldera. “Gaur zuhaixkak direnak bihar baso izango direlako”.
Barikuan eta zapatuan ere ondo pasatzeko aukera
Barikurako eta zapaturako ere jai giroa dakar Ibilaldia Elkarteak. Barikuan, esaterako, Jon Enbeita muxikarrak kantaldia emango du Gernika-Lumon. Hain zuzen Ibilguneko tabernan joko du Ibilaldiaren alde. 20:00etan hasiko da bertoko bakarlariaren kantaldia. Sarrera doakoa da.
Zapatuan, bestalde, Nabarnizera lekualdatuko dute Ibilaldiaren aldeko giro alaia. 17:30ean, esaterako, pilota partidak jokatuko dituzte gazte eta nagusi mailetako pilotariek. Gazteen arteko partidan, Zubikaraik eta Urizarrek Etxebarriaren eta Esainen kontra neurtuko dituzte indarrak. Nagusietan, bestalde, Goñi IIak eta Martinez de Eulatek Agirreren eta Otxandorenaren kontra jokatuko dute.
Pilota partiden ostean bertsolarien txanda izango da. Julen Erezuma eta Ibon Ajuria ariko dira bertsotan, frontoian bertan. Bertsolariek amaitzean, Ibilaldiaren aldeko zozketako zenbaki saridunak emango ditu jakitera jai egun handia antolatzen ari den elkarteak.
Jai egunari amaiera emateko, triki-poteoa eta afaria egingo dituzte bildutakoek. Afarirako txartelak erosteko epea zarratu egin dute dagoeneko. Triki-poteoa, bestalde, 19:30ean hasiko dela iragarri dute.
