Sustatxa eta Ibarra
Tronpa musika tresna gutxietxia da, eta ez da ohikoa izaten gazteek berori aukeratzea. Mikel Ibarra gazte gernikarrak, baina, musika tresna horren aldeko hautua egin zuen, eta primeran pasatzen du tronpagaz entseatzen. Nabarmendu duenez, gozatu egiten du tronpa jotzen duen bakoitzean, eta aurrerantzean ere berdin gertatzea espero du.
Ibarra primeran moldatzen da tronpagaz, eta horren adibide da Euskadiko Ikasleen Orkestran (EIO Gazte) jotzeko aukeratu izana. Gernikarraren tronpa irakasle Artur Sustatxak jakinarazi duenez, «musika ikasle batek jaso dezakeen errekonozimendu handiena da gazteen orkestran jotzeko aukera izatea». Nabarmendu duenez, Athleticen harrobian egotearen antzekoa da musikari batentzat.
Ibarrak isil-isilik begiratzen dio Sustatxari adierapen horiek egiten dituen bitartean. Jakin badaki lorpen handia dela, baina ez du harrotasunez berba egiten. Dioenez, oso pozik dago Euskadiko Ikasleen Orkestran jotzeko aukera izango duelako. Hala ere, familiako kideen animoek bete dute gehien. «Senideak eta lagunak asko poztu dira, eta guztiek zoriondu naute».
Musikari gazteak Bilbon egin zituen hautaketa probak. Sustatxak dioenez, batez ere kontserbatorioetako ikasleei zuzendutako hautaketa probak dira. Hala, «arraroa» da Gernika-Lumoko musika eskolak horrelako ohore bat izatea.
Hautaketa probetan 200 musikari gaztek parte hartu zuten, eta 60 aukeratu zituzten epaimahaiko ordezkariek. Tronparen kasuan, esaterako, hamasei musikarik eman zuten izena, eta lehia gogorra izan zuen Ibarrak. Jakinarazi duenez, hautaketa proba oso ondo egin zuen. «Iaz ere parte hartu nuen, eta aurten lasaiago jotzeko aukera izan dut». Dioenez, iazko esperientziaren ostean, urduritasuna albo batera uztea lortu zuen.
Ibarraren berbetan, «esperientzia ederra izango da orkestragaz jotzea». Azaldu duenez, Bilboko, Donostiako eta Gasteizko areto garrantzitsuenetan jotzeko aukera izango du. «Gernika-Lumoko bandagaz ere zenbait kontzertu jo ditut, baina orkestragaz jotzea berezia izango da». Hain zuzen, ekainaren 26an, 27an eta 28an joko ditu kontzertu horiek.
Momentuz, Segundo Olaeta Musika Eskolan eta etxean entseatzen du gernikar gazteak. Hala ere, Aste Santu inguruan EIO Gazteko gainontzeko musikariekin batu beharko du entsegu orokorrak egiten hasteko.
Bilboko, Donostiako eta Gasteizko kontzertuak prestatzeko, bestalde, ekainean batuko dira. Klaseak amaituta, astebete inguruz batuko dira orkestrako kide guztiak. Lehen egunetan atalkako entseguak egingo dituzte, eta ostean musikari guztiek entseatuko dute batera. Astebeteko egonaldi horren azken egunetan joko dituzte kontzertuak.
Sustatxaren ustez, Ibarrak ikasle gazteen orkestragaz entseatzeko eta jotzeko aukera izatea oso onuragarria izango da musikari bezala hazten jarrai dezan. Izan ere, Euskal Herriko musikari profesionalek zuzenduko dituzte entsegu horiek.
Musika zaletasuna albo batera utzi barik, bestalde, ondo pasatzeko aukera ere izango du Gernika-Lumoko musikari gazteak. Azaldu duenez, «nire adina duten musikari gazteekin batuko naiz, eta gauza berriak ezagutzeko aukera izango dut».
Segundo Olaetako maisuak nabarmendu duenez, Ibarrak abesti klasiko famatuak joko ditu EIO Gazte orkestragaz. Haren berbetan, Gernika-Lumon oso zaila da horrelako errepertorioa jotzea. Horregatik, Ibarra pribilegiatu bat dela deritzo. Bertoko ikasle batek erronka horri aurre egiteko aukera izatea goraipatzekoa dela uste du.
Abilezia berezia tronpagaz
Ibarra zazpi urtegaz hasi zen tronpa jotzen. Aipatu duenez, «kasualitatez» hasi zen tronpa jotzen, eta dagoeneko zazpi urte daramatza musika tresna horregaz. Sustatxaren berbetan, «tronpa jotzeko berezko trebezia zeukala ikusi genuen, eta musika tresna hori aukeratzeko gomendioa egin genion».
Musika eskolan egin zituen lehen urteetan nabaritu zuten Ibarrak tronpa jotzeko erraztasun handia zeukala. Izan ere, 3 eta 6 urte bitartean, Segundo Olaetako gazteek musika tresna guztiak probatzen dituzte. Sustatxak dioenez, «oso zaila da tronpari soinu ona ateratzea, baina Ibarrak lehen momentutik erakutsi zuen trebezia itzela». Hala, tronpa aukeratuz asmatu egin zuela deritzo gernikarraren maisuak.
Ibarrak argitu duenez, nahi barik hasi zen tronpa jotzen, baina orain oso gustuko duela dio. «Gozatu egiten dut, eta hori da garrantzitsuena».
Gernika-Lumoko musikari gazteak ez du etorkizunean pentsatzen, baina tronpa jotzen jarraituko duela esan du. «Ez dakit musikatik bizitzea gustatuko litzaidakeen, baina jotzen jarraituko dut, tronpak asko betetzen bainau». Dioenez, etorkizunean pentsatzeko aukera izango du aurrerago ere.
Bitartean, tronpari soinua ateratzen jarraituko du. Astean hiru edo lau biderrez entseatzen du etxean, eta momentuz ez du kexarik jaso. Auzoko bizilagunek, gainera, jotzera animatzen dute musikari gaztea. «Oso ondo moldatzen naizela eta, luzaroan jotzeko eskatzen didate», azaldu du aurpegiko irribarrea ezkutatu ezinik.
Ibarraren auzokideak bezala, Sustatxa ere oso harro dago Ibarrak lortu duen mailagaz. Dioenez, «ikasle batek maila ona lortu duela sentitzea oso aberasgarria da maisu batentzat; bereziki betetzen zaitu».
