Etxerik etxe eta aterik ate oles egiten

https://www.youtube.com/watch?v=-RNgOD5kD94&feature=youtu.be

Busturialdeko Hitza

Busturialdea

2014/02/04

Makilen zintzarri hotsa entzun da gaur egun osoan Busturialdeko txokoetan. Dotore jantzita, aterik ate, urteroko ohiturari hutsik egin barik ibili dira kantuan ume, gazte eta nagusiak. Eskolen txanda izan da, batez ere, goizekoa. Kantu kantari, talde handiek gogora ekarri dute Santa Ageda bezpera dela gaurkoa, kopla ezagunak abestuz. Kalerik kale, auzorik auzo egin dute ibilbidea, eztarriak bero-bero. Herritarrez gain, elkarteak, eta abesbatzak atera dira kalera arratsaldean. Herriko txokoak alaitzeaz gain, gogoan eduki dituzte herriko nagusiak. Horrela, herriko zaharren eta erretiratuen egoitzetan elkartu dira, besteak beste, Busturiko eta Mundakako taldeak. Herrigunetik urrunago dauden auzoek eta baserriek ere izan dute bisita. “Pozik” hartu dituzte santa eskean zebiltzanak. Astebururako hitzordua Ohitura Santa Ageda bezperan abestea bada ere, astebururako ere utzi dute lan hori herri batzuetan. Horrela, zapatuan aterako dira Ajangizen eta Nabarnizen. 16:00etan batuko dira Mendietako plazan ajangiztarrak, eta Hirugarren Adinekoen Elkartean antolatuta, domekan aterako dira abestera nabarniztarrak, egun osoan. Kabelinatxe dantza taldeko umeak baserriz baserri ibiliko dira, santa eskean. Akordan hasi eta Bollar, Zeeta, Garai, Gabika, Atxoste, Basetxeta eta Elizaldera joango dira. Gabikako txokoan egingo dute hamaiketakoa, eta Aritaberri Jatetxean ere mokadua jateko aukera izango dute. Eguna amaitzeko, afaria egingo dute Ereñozar jatetxean . Santa eskean batzen duten dirua bere ekintzak eta jarduerak aurrera eramateko erabiliko dudantza taldeak.