Bermeoko portuko kalteak konpontzeko lanean hasi da Portu Zuzendaritza

Busturialdeko Hitza

Busturialdea

2014/02/03

Eusko Jaurlaritzako Ingurumen sailburu Ana Oregik esan du itsas-denboraleak euskal kostaldean sortutako kalteen gutxi gorabeherako zenbatespena eramatekoa asmoa duela biharko Eusko Jaurlaritzako kontseilura. Sailburuaren arabera, Jaurlaritzako eta Kosta Mugapeko teknikoak “porturik portu eta herririk herri” dabiltza denboraleak sortutako ondorio eta kalteak aztertzen, “hainbat arinen erantzuna eman ahal izateko”. Bestalde, Oregik nabarmendu du, Euskalmet gai izan dela gertatuko zena hurbiltasunez aurreikusteko, eta horrek ondo prestatuta izatea ahalbidetu duela gaineratu du. Denboraleak eragindako kalteen inguruan, bestetik, “asko” izan direla esan du; “errepideak apurtuta, lurjausiak zenbait gunetan, desagertutako hondartzak… Konpondu beharreko hainbat gauza”. Halaber, instituzioen arteko elkarlana “garrantzitsua” dela baieztatu du Ingurumen sailburuak; hartara, “beharrezkoa den laguntza eman ahal izateko”. Era berean, aseguruek ematen duten estaldura nolakoa den ikusi beharko dela adierazi du, eta, horregaz batera, instituzioek eman ditzaketen laguntzak ere aztertu ebharko dituztela. Bermeoko Udalak jakinarazi duenez, gaur 07:45 inguruan heldu dira Portu Zuzendaritzako beharginak Bermeoko portura, itsas denboraleak sortutako sortutako kalteak kopontzeko. Hala, Frantxuen haitzetako horma eta olatu-horman egindako zuloa egonkortzea izango da, behinik behin, euren beharra. Hala, konponketa horiek egin ahal izateko beharrezkoa duten garraioa igaro dadin, errepideak moztuta jarraitzen du ibilgailuentzako Bermeoko sarrerako biribilgunetik. Portuan, gainera, Frantxuen haitzetatik aurrera ere sarbidea debekatuta dago ibilgailu zein oinezkoentzat. Bide mozketa hori lanen iraupenaren araberakoa izango dela jakinarazi du udalak. Bermeoko Udalak itsas denboraleak sortutako kalte guztien balorazioa egiteari ekin dio gaur, eta egunotan horretan ariko dela azaldu du. Portuan ez ezik, Aritzatxu hondartzan eta Harribolasen ere aritu da sortutako kalteak zenbaterainokoak izan diren ikuskatzen. Hala ere, kai muturra ahalik eta azkarren konpontzeak dauka lehentasuna, Idurre Bideguren Bermeoko alkatearen ustez; izan ere, eguaztenerako ere itsaso zakarra iragarrita dago, eta hori konpondu ezean, “portura sartzeko ateak irekita izango ditu itsasoak”. Oraingoz, hormigoizko blokeen bitartez ari dira betetzen kai-muturrean itsasoak egindako zuloa. Itsas denboraleak sortutako kalteak bertatik bertara ikuskatzen aritu zen atzo Iñigo Urkullu lehendakaria, besteak beste, Bermeon. Horrez gain, helikoptero batetik ikusi ahal zituen denboralearen ondorio larriak, eta kaltetuenak Bermeo, Donostia eta Zarautz izan direla berretsi zuen, batik bat, horietako bizilagunengan zuzenean eragin izan duelako. Orion ere kalteak handiak izan direla esan du Urkulluk, eta Lekeito eta Mendexa arteko Karraspio gaineko bidearen egoera ere nabarmendu du. Zarauzko malekoia, lorategiak eta lokalak ere oso kaltetuta daudela esan du. Herritarrek emandako laguntza bereziki goraipatu du Urkulluk, eta baita erakundeen eta Euskalmet meteorologia agentziaren lana ere, bere aurreikuspenek berehalako erantzun bat eman ahal izatea erraztu baitute. Gaur kalteak baloratzeko eguna izango dute erakundeek. Iñigo Urkullu lehendakariak nabarmendu duenez, “euskal erakunde guztiak lanean gara, izan diren kalteak konpontzen saiatzen”. Kalte larriak Itsasoaren indarrak hiru lekutan apurtu zuen Bermeoko olatu-horma, eta, ondorioz, babesik gabe geratu da portua. Atzo bertan olatu-horma indartzen izan ziren, arratsaldeko itsasgorak sor zezakeenaren beldur. Azkenean, baina, ez zen aparteko ezer jazo. Domeka goizaldeko olatu handiek pantalanak ere apurtu zituzten Bermeon, ontziak hondoratu, portuko hiri-altzariak apurtu… Portuko lokaletara ere ura sartu zen, eta gizon bat lonja batean harrapatuta geratu zen, atera ezinik. Portuan bakarrik ez, Bermeoko beste leku batzutan ere izan du eragina itsas denboraleak; esaterako, Aritzatxu hondartzan. Gaztelugatxeko San Juanerako bidea ere itxi egin behar izan zuten atzo, eskaileretan kalteak izan baitziren. Gainontzeko herrietan ere hainbat kalte Ean, Elantxoben eta Mundakan ere pairatu dituzte itsas denboralearen ondorioak. Ean, esaterako, olatuek errekan gora egin ondoren, hareaz bete dira kaleak. Elantxoben, berriro sartu da ura Arraun Elkartera, eta, oraingoan, elektrizitatean arazoak sortu ditu; Lapatzako moilan dagoen baranda ere apurtu egin dute olatuek. Segurtasun neurri legez, Arraun Elkarterako bidea moztu zuten atzo, ibilgailu zein oinezkoentzat. Halaber, Elantxobera sartzeko errepide zati bat ere apurtu egin dela jakinarazi du Elantxobeko alkate Koldo Olagibelek, eta horrek kezka sortu du udalean; “bide barria jausteko beldur gara, beraz, serio hartu eta zerbait egin beharko da”, adierazi du alkateak. Ezbehar horiek Errege egunean itsasoak sortutako kalteak konpontzeko aurreikusten zuten kostuan igoera ekarriko dutela esan du Olagibelek; hala, orduko hartako kalteak konpontzeko 30.000 euro inguru kalkulatu bazituzten re, orain 40.000-50.000 euro inguru beharko direla aurreikusten dute. Dena den, bihar batuko dira Elantxobeko alkatea, arkitektoa eta peritua kalteak zenbaterainokoak diren ikuskatzeko. Mundakari dagokionez, gaur dabiltza teknikoak itsasoak zein kalte sortu zituen ikuskatzen, nahiz eta udaltzainek euren txostena egina duten. Besteak beste, Txorrokopuntako zenbait baranda bota zituen itsas-denboraleak, eta Atalaiako harri-horma bat eta portuko pantalan bat hautsi zituen itsasoak.