Nagusietan iazko parte hartzea bikoiztu du Bermeoko X. Herri Lasterketak

Busturialdeko Hitza

Busturialdea

2014/01/27

Herri lasterketan emakumeen parte hartzea indartzea da antolatzaileen asmoa, eta aurten, helburua bete dute; izan ere, nagusien artean, %30a emakumeak izan dira. Guztira, 848 herritarrek parte hartu dute Bermeoko X. Herri Lasterketan; horietatik 253 pertsonek nagusien mailan parte hartu dute, eta gainontzeko 595 herritarrek, barriz, umeen mailan. Iaz, 605 herritar izan ziren lasterketan parte hartu zutenak; 128 nagusi eta 477 ume. Gainera, nagusietan, emakumeen parte hartzea oso murritza izan zen, 19 neskak baino ez zuten parte hartu eta; aurten, ostera, 67 izan dira lasterketa egin dutenak. Beraz, iazkoarekin alderatuz, nagusietan parte hartzea bikoiztu egin da aurten, eta emakumeen parte hartzea ere nabarmen igo da. Emaitza horiek ikusita, “oso pozik” dira antolatzaileak. Herriko jendeak parte hartzea du helburu, batez ere, Bermeoko herri lasterketak, eta aurten, gehiago izan dira kirol arropak jantzi eta kalera lasterka atera direnak. Bermeotarrez gain, inguruko herrietako jendea ere bertaratu zen domekan Bermeora; hala, Gernika-Lumokoek, Bilbokoek, Getxokoek, Bakiokoek, Gipuzkoakoek… ere egin zuten korrika. Bestalde, minbizia duten umeen aldeko elkartasuna adierazteko ere baliatu zuten hainbatek domekako lasterketa. Hala, Eutsi gogor Ibontxu leloa daraman kamiseta soinean jarrita aritu ziren lasterka parte hartzaile asko eta asko. Kamiseta horiek salduta, Aspanovas Bizkaiko minbizidun haurren gurasoen elkartea lagundu nahi dute. Bermeon bertan izan zituzten salgai domekan, eta lasterketako antolatzaileek jakinarazi dutenez, guztiak agortu ziren. Aurtengo lasterketagaz “pozik”, beraz, herritarren egutegian ohitura bezala finkatu gura du Bermeok herri lasterketa.