Ikasteko ordutegi berezia izango dute ikasleek azterketa garaian Bermeon, Gernika-Lumon eta Mundakan
Gernika-Lumoko kasuan, astelehenetik barikura ez ezik, asteburu bitan ere zabalduko dute liburutegia urtarrilean. Hala, astelehenetik barikura, 09:00etatik 14:00etara eta 15:00etatik 21:00etara egon ahalko dira herritarrak liburutegian, ohiko legez; zapatuetan, barriz, 10:00etatik 14:00etara eta 15:00etatik 20:00etara, eta domekan, 10:00etatik 14:00etara. Ordutegi hori, baina, urtarrilaren 11rako, 12rako, 18rako eta 19rako izango da baliogarria; gainontzeko egunetan, astelehenetik barikurako eta zapatu goizetako ordutegia mantenduko dute.
Mundakan, bestalde, goizez zein arratsaldez zabalduko dute liburutegia astelehenetik barikura: 09:30etik 13:30era eta 16:00etatik 20:00etara. Ordutegi berezi hori martxan dute jada, eta urtarrilaren 31ra arte luzatuko dute.
Bermeoko Gizarte eta Kultura Etxeko ikasketa gelek ere ordutegi berezia izango dute azterketa garaian. Hala, urtarrilaren 11n, 18an eta 25ean 10:00etatik 14:00etara eta 16:00etatik 21:00etara izango dira irekita; beraz, ikasleek tarte gehiago izango dute azterketak prestatzeko. Dena den, astelehenetik barikura ohiko ordutegia mantenduko dute; alegia, 09:00etatik 14:00etara eta 16:00etatik 21:30era.
