Asteburuan jokatuko dute Euskal Surf Zirkuituko azken proba Mundakan

Busturialdeko Hitza

2013/12/18

Joan den asteburuan jokatzekotan baziren ere, azkenean asteburu honetan lehiatuko dute Monster Euskal Surf Zirkuituko azken proba. Mundakan izango da, barikuan, zapatuan eta domekan. Asteburu honetarako itsas iragarpen hobea aurreikusten dutelako atzeratu dute joan den asteburuko hitzordua. Mundakara bertaratzen denak euskal surflari onenen arteko lehiaz gozatzeko aukera izango du egun horietan; izan ere, beste hainbategaz batera, bertan izango dira Eneko Acero, Natxo Gonzalez, Iker Fuentes, Alex Gironi, Ander Mendiguren, Ethan Egiguren eta Imanol Yeregi. Parte hartzaile guztiek barikuan 08:30ean egin beharko dute checking-a, Atalaian. Itxaron zerrendan dauden surflari guztiak ere, txapelketara joan beharko dira eta checking-a goizeko lehen orduan egin beharko dute horiek ere, beren postuan mantentzeko. Horrela ez bada, postua galduko luketela jakinarazi du Euskal Herriko Surf Federazioak. Gizonezkoen kasuan, EHSF OPEN Zirkuiturako lehiaketa puntuagarria izango da asteburukoa; emakumezkoena, aldiz, erakustaldia izango da, ez baita puntuagarria izango EHSFren sailkapenerako. Txapelketako formatuari dagokionez, bestalde, kanporaketan piramidal sistema erabiliko dutela jakinarazi dute: alegia, 4ko 12 txanda, 4ko 6 txanda, 3ko 4 txanda, 4ko 2 txanda, 2 txanda man to man eta finala man to man egingo dituzte. Hain justu, 25 minutuko 27 txanda jokatuko dituzte, eta, beraz, 11-12 ordu iraungo ditu txapelketak.