Elantxobeko portuko kale-argiak aldatu ditu Eusko Jaurlaritzak, energia aurrezteko

Busturialdeko Hitza

Busturialdea

2013/11/05

Elantxobe. CC BY-3.0-ES 2012/EJ-GV/Irekia-Eusko Jaurlaritza/Mikel Arrazola

Energia aurreztea eta kutsadura luminikoa murriztea helburu, Bizkaiko portuen argiztapenari buruzko ikerlana ari da egiten Eusko Jaurlaritzako Ingurumen eta Lurralde Politika Saila. Hari horretatik, dagoeneko zenbait neurri hartu dituela jakinarazi du. Hain zuzen, Elantxobeko eta Lekeitioko portuetako farolak aldatu ditu. Zehaztu duenez, Elantxobeko portuko 33 kale-argiak eta Lekeitioko portuko 56ak ordezkatu ditu, kontsumo baxukoak jarriz. Aldaketa horrekin, egunean 2.300 wh aurreztuko ditu Elantxoben, eta 7.700 Lekeition. Azpiegituren zuzendari Almudena Ruiz de Angulok esan du gakoak ez datzala argi gutxiago jartzean, baizik eta argiteria publikoaren efizientzia hobetzean, eta merkeagoa eta garbiagoa izatean. Bestalde, Ondarroako errioaren hegaletako farolak eta hondartzako dikekoak ere aldatuko dituela aurreratu du Ruiz de Angulok, kasu horretan ere kontsumo baxukoak jarriz. Alabaina, Calatrava zubian LED motakoak jarriko ditu. Horiek %65 gutxiago kontsumitzen dutela, biziraupen luzeagoa dutela (70.000 eta 100.000 ordu artean), jartzeko errazagoak direla eta mantenu gastu txikia daukatela argitu du. Hartara, zubian egingo duen aldaketagaz, egunean 16.200 wh aurreztuko dituela aurreikusten du.