6.700 euroan erosi du Mendata Berria jatetxeak Olaberriako Aizpearen gazta erdia

Busturialdeko Hitza

Busturialdea

2013/10/28

Olaberriako Aizpeako arduraduna, Jose Mari Gorroño alkateagaz, sari banaketan

Urriko Azken Asteleheneko azokako gaztarik onena Olaberriako Aizpearena izan da aurten. Jose Antonio Bastegieta Markok gidatutako enkantean, 6.700 euroan erosi du haren gazta erdia Mendata Berria jatetxeak (Bilbo). Agiñigako Larrabek eroan du gaztetan bigarren saria., eta Muniaingo Zabaletak eta Gereñuko Andikana anaiek irabazi dituzte hirugarrena eta laugarrena, hurrenez hurren. Bigarren gazta saritua, Agiñigako Larraberena, 100 euroan atera dute enkantera. Ondarroako Sutargi jatetxeak egin du lehen eskaintza, baina azkenean Xaibor-ek erosi du, 700 euroan. Enkantea gori-gori egon da. 400 eurotan atera dute gazta irabazlea, eta Mendata Berriak igo du eskaintza, 500 eurora. Morgako Bitxia Txakolinak, Morgako Katxi jatetxeak, Xaibor-ek eta Ondarroako Sutargi jatetxeak egin dituzte ondorengo eskaintzak, baina kopururik altuenak Xaibor-ek eta Mendata Berria jatetxeak ezarri dituzte. Azkenean, baina, azken horrek erosi du gazta erdia. Sariekin jarraituz, txakolin zurietan Zamudioko Magalarte nagusitu da, eta Larrabetzuko Sasines eta Lezamako Erdikoetxe gorrietan eta beltzetan. Barazkietan, beste behin, Urdulizko Adela Andikoetxeak irabazi du. Gatikako Itziar Etxebarriarenak izan dira, bestetik, frutarik onenak. Ezti milaloren sailean Zornotzako Valentin Llonak irabazi du, eta Gernika-Lumoko Mari Carmen Alzibarrek loretan, iaz bezala.

Magalarteko arduraduna, saria jasotzen

Beste behin, milaka lagun hartu ditu gaur herriak, baserritarren egun handian. 277 saltoki egon dira denetara, eta 09:00etatik euskal soloetako produkturik onenak eskuratzeko aukera eduki dute bisitariek. Eguraldiak ez du lagundu, eta goizean goiz beste urte batzuetan baino jende gutxiago ibili da herriko kaleetan. Orduek aurrera egin ahala, baina, jendetza iritsi da, eta batez ere saltokien inguruan ibili da jendea. Hala ere, bisitari kopurua aurreko urteetatik nahikoa urrun gelditu da. Izan ere, beste edizio batzuetan 100.000 pertsona izan diren bitartean 60.000 kalkulatu ditu Gernika-Lumoko Udalak aurten.

Gaztaren 74 saltoki egon dira, ortuarien 47, artisauen 46, fruten hamabi, makinariaren hamahiru, eztien sei, txakolinen hogei, ogi eta euskal pastelen 22, kontserben hamabi, sagardoen sei, erroskilen bost, esnekien eta loreen bina eta bestelako produktuen bost. Horiek guztiek parte hartu dute ortuarien, fruten, loreen, txakolinen, eztien eta gazten lehiaketan.

Aterki asko ikusten dira gaur Gernika-Lumon

Aurten ere epaimahaia nekazal munduko teknikari adituek osatu dute, Bizkaimendiko, Bizkaiko Foru Aldundiko eta Jatorrizko Deiturako kideek puntuatu baitituzte produktuak. Gaztak dastatzen sukaldari ospetsuak aritu dira: Haizian jatetxeko Jose Miguel Olazabalaga, Jauregibarriako Beñat Ormaetxea, Baskook jatetxeko Aitor Elizegi, Zalloko Iñigo Ordorika, Zortzikoko Daniel Garcia, Minako Alvaro Garrido, Tamesiseko David Garcia, NH Hotelak kateko Txomin Gomez, Boroako Jabier Gartzia eta Itsasmendi upategiko enologo Ana Martin. Saltokiez gain, bederatzi txosna izan dira. Foru plazan (Apareu eta Arkupe pelota elkartea), Ciutat de Bergan (Gernika saskibaloi), Pasealekuan (AEK/ Busturialdean Euskaraz Bizi), Saraspen (Gernika Off Road), Alondegian (Jai Alai), Adolfo Uriosten (Esan) eta Domingo Alegrian (Gernika Club eta Rugby Taldea) egon dira txosnak. EHNE sindikatuarenak osatu du eskaintza, Juan Calzadako lokalean. Gernika-Lumon batzen den jendetza dela eta, protestak egiteko egun aproposa izan ohi da Urriko Azken Astelehena, eta gaur ez da salbuespena izan. Hala, Eroski eta Fagorren menpeko ekarpenen auziko kaltetuek beren arazoaren berri eman dute Gernika-Lumon, Euskadiko Kutxaren eta Santander banketxearen aurrean protesta eginez. “Caja Laboral, Eroski, Fagor lapurrak” aritu dira oihukatzen.