3.000 ikusle bildu ditu Bermeo-Athletic partidak

Busturialdeko Hitza

Busturialdea

2013/07/15

Partidaren une bat. Argazkia: Athletic Club.

Bermeo 1-Athletic Club 6. Emaitza horregaz amaitu zen zapatuan jokatutako elkartasun partida. Galdu edo irabazi, dena den, gutxienekoa zen, apirilaren 11ko suteak kaltetutako bizilagunentzako dirua biltzea baitzen norgehiagokaren helburua. Partidarako sarrerak ondo saldu ziren, eta azkenean 3.000 ikusle bildu ziren Itxas Ganen. Sutea jazo zenean herritar anonimo batek zabaldutako kontu korrontean batutako diruaren txekea emateko be aprobetxatu zuten hitzordua. Hain justu, kaltetuei emateko 9.370 euroko ekarpena egin dute herritarrek kontu korronte horretan.

Partidara itzulita, Ernesto Valverderen mutilek urdinez jantzita jokatu zuten, bigarren ekipazioagaz. Hain zuzen, ondokoa izan zen Athletic-ek aurkeztutako hamaikakoa: Iraizoz; Iraola, Balenziaga, Albizua, Gurpegi, San Jose, Ruiz de Galarreta, Iturraspe, Aduriz, De Marcos, Ibai. Bermeok, aldiz, Magu, Ibon, Algorta, Ispi, Iturri, Jose Lopez, Aitor Ramos, Susmozas, Josu Santamaria, Izarra eta Zabaleta atera zituen zelaira.

Golak: 0-1: Min. 9; De Marcos. 0-2: Min. 12; De Marcos. 0-3: Min. 41; Aduriz. 1-3: Min. 44; Aitor Ramos. 1-4: Min. 80; Toquero. 1-5: Min. 82; Sola. 1-6: Min. 90, Beñat.