Jendetsua izan da aurten be Arrain Azoka
http://youtu.be/jSU2Z2qbJiM
Arrain Azokak ez du hutsik egiten. Beste behin be, hainbat izan dira azokara hurbildu diren herritarrak eta haren inguruan antolatutako jardueretan parte hartu dutenak be. Herritarrez gain, inguruko herrietatik etorritakoak be animatu dira. Arrantza eta itsasoaren mundua zabaltzea, sasoiko produktuen kontsumoaren garrantzia nabarmentzea eta kontserba industria bultzatzea ziren aurtengo Arrain Azokaren hiru helburu nagusiak eta horiek «bete» egin direla uste du Bermeoko alkate Idurre Bidegurenek. Parte hartzea zein salmentak «arrakastatsuak» izan direla aipatu du. Enpresen %90ak salmenta aurreikuspenak bete dituztela azaldu dute,«krisi ekonomikoak espero baino gutxiago eragin duela», nabarmenduta.
Sasoian sasoiko arrainak kontsumitzearen garrantzia nabarmendu gura izan du XIX. Arrain Azokak. Hori dela eta, lehenengoz, arrain freskoa eta sasoikoa erosteko aukera eskaini du arrandegi ibiltari batek, eta jendez beteta bili da asteburu osoan. Batzuek arrandegian erositako arraina etxera eroan zuten, beste batzuek, barriz, ondoan zegoen jantoki-karpan prestatuta jan zuten. Bestalde, aurton estreinakoz baita be, sardinak eta atuna eskaintzen zuen txosna bat ipini dute, eta «harrera bikaina» izan duela jakinarazi dute.
Azoka hutsa baino gehiago da Arrain Azoka; izan be, arrantza eta itsasoaren mundua zabaltzea helburu izanik, hainbat ekimen antolatzen dituzte. Arrain salmenten simulazioek «arrakasta handia» izan dute barriro. Bidegurenen esanetan, «salmenta itxurak egin aurretik, Kofradi zaharreko sirena hotsa entzuteak, antzinako portuko girora itzultzeko aukera emoten digu». Azokan bertan, sareginen lana egiteko modua ezagutzeko aukera be badago, baita korapiloak eta arrantzarako tresnak egiten ikasteko aukera be, arrantzale oihak ibiltzen baitira horretan. Kuxkexean ibiltzen diren bisitari askok, tartetsu bat izaten dute horiek zelan lan egiten duten ikusteko, eta harrera «oso ona» izan duela aipatu dute udaletik.
Ilarak latie emongotzut jokoan parte hartzeko
Ekitaldi horretan, gainera, kontserba enpresek aurrerantzean beraien irudia izango den logotipoaren aurkezpena egin zuten, Iraia Ladislao gernikarrak egindakoa. Zehaztu dutenez, Euskal Herri osotik bidalitako 87 proposamen aurkeztu dituzte logotipo lehiaketara. Logoa hasi dira jada Arrain Azokan erabiltzen.
Pack solidarioak
Bermeoko kontserberek prestatutako sorta solidarioak be erosi ahal izan dira aurtengo Arrain Azokan. 15 eurotan saldu dituzte, eta horien salmentatik bildutako dirua Bermeoko alde zaharreko sutean kaltetuta izan ziren familientzat izango da. Jakinarazi dutenez ia sorta guztiak saldu dituzte.
Bizkaiko kontserba enpresetako beharginek protesta egin zuten barikuan, Arrain Azokaren hitzordua aprobetxatuta. Hitzarmen duin bat aldarrikatzeko elkarretaratzea egin zuten, Lameran bertan.
Dakarreko Kanpainak liburuaren aurkezpena
Bariku arratsaldean, Jose Maria Ferarios Lazaro AZTIko teknikariak idatzi duen Dakarreko Kanpainak liburua aurkeztu zuten Nestor Basterretxea aretoan. Idazleaz gain, Bittor Oroz, Eusko Jaurlaritzako Nekazaritza eta Landa Garapeneko sailburuordea eta ANABAC eta OPAGAC erakundeetako eta Bermeoko Kofradiako ordezkariak bertaratu ziren, besteak beste.
Dakarreko Kanpainak liburuak Afrikan atunaren arrantzan aitzindari izan ziren zenbait lagunen lekukotasunak jasotzen ditu. Hain zuzen be, 1956 eta 1965 urteen artean egin ziren bederatzi kanpaina nagusiak eta argitalpenak horien barri emoten du. Liburua, Ferariosek hainbat urtetan egindako dokumentazi lanaren emaitza da.
