Mendatako etxe pasiboen erosleek %40 aurreztuko dute energia kontsumoa

Busturialdeko Hitza

Busturialdea

2013/04/25

Gaur goizean Mendatan egindako aurkezpena

Sopelan eraiki zuten passivhaus (etxe pasiboa) estandarrei jarraiki eraikitako Arabako, Bizkaiko eta Gipuzkoako lehenengo etxebizitza, baina Busturialdean bada Estatu mailan aintzindari izango den egitasmo bat, Mendatako Udalak Alemaniako Passivhaus Institutuaren estandarretan oinarritutako hamabost etxebizitza eraiki gura baititu. Etxebizitza pasibo bat eraikitzea apur bat garestiagoa izan arren, horien erosleek segituan amortizatuko ditutela nabarmendu dute sustatzaileek. Izan be, etxebizitza arruntekin alderatuz gero, energia kontsumoa %40 aurreztea ahalbidetzen dute Alemaniako institutuaren estandarretan oinarritutako eraikinek. Berogailu sisteman, bestalde, %85 aurrezten laguntzen dute. Atzo bertan egin zuen Mendatako Udalak proiektuaren aurkezpena Elizosten, Eraginkortasun energetikoa guztion esku lelopean. Aurkezpenean, inguruko herrietako alkateak eta teknikariak batu ziren, etxebizitza mota horien onurak ezagutze aldera. Guztira, 40 lagun inguru batu ziren ekitaldian. Joseba Mallea alkateak azaldu zuenez, eraginkortasun energetikoan oinarrituta, etxebizitza tasatuen gaiari «beste buelta bat» emon gura izan dio udalak. «Herri txiki batentzat proiektu oso aberasgarria izan daiteke etxebizitza pasiboena, jende gaztea erakartzeko balio baitu», Mallearen esanetan. Hala, inguruko herritarrek proiektuan parte har dezaten eskatu du. Diego Arzanegi arkitektoa etxebizitza pasiboen onurez mintzatu zen. Haren berbetan, aurrezpen energetikoa etorkizuna da, «energiarik merkeena erabiltzen ez dena baita». Hala, etxebizitza pasiboak «errentagarriagoak» direla uste du Arzanegik. Proiektu aitzindaria «Aurrezpen energetikoaren eta etxebizitza eskuragarrien alde» eginez, passivhaus estandar zorrotzetan oinarritutako etxebizitza tasatuen Estatu mailako lehenengo promozioa ari da garatzen Mendatako Udala. Proiektu horrek «kalitateko etxebizitza eskaintzen» duela dio udalak; baita ingurumena zaintzen duela, kontsumo energetiko «oso baxukoa» dela, «eta prezio onekoa». Zehazki, hamabost etxebizitza tasatu eraikitzea aurreikusten du, denak passivhaus irizpideetan oinarrituta. Faseka eingo dituzte etxeak, bost fase bakoitzean. Promozioa kooperatiba erregimenean egingo dute, eta babestutako etxebizitzen udal ordenantzako baldintzak betetzen dituzten pertsonei zabalik dago. Etxebizitzak kooperatiba erregimenean eginda, bitartekariei ordaindu beharreko gastuak albo batera utziko lituzkete erosleek, etxebizitza eraikitzea merketuz. Informazio gehiago jaso gura duten herritarrek udalagaz jarri beharko dute harremanetan.

Mendatako etxe pasiboen erosleek %40 aurreztuko dute energia kontsumoa

Bizkaia

Bizkaiko umeek eta nerabeek euren iritzia kontuan hartzeko eskatu dute

Europako pintzelek irudikatutako Amerika bildu du Bilboko Arte Ederren Museoak

Bilbon gizon homosexualak hiltzen zituen gizona hirugarren aldiz zigortu dute hilketagatik

Manifestaziora deitu dute Erandioko Los Ochos eraikinetako bizilagunak etxegabetu nahi dituztela salatzeko

Andre eskulangileek erakusleiho bat izango dute bihar Diman

Bidesariaren aurkako plataformak AP-68agatik ez ordaintzera deitu ditu gidariak

Santurtziko Udalak aitortu du udaltzainek ez dietela Ander S.T.-ren heriotza eragin zuen atxiloketari buruzko informazio osoa helarazi

Portugaleteko Gurdibide, munduko hiri mahastien taldean

Deslokalizazioaren eta desmemoriaren aurkako literatura

Gogora-k Urduñako espetxe frankistan hil ziren beste bost presoren gorpuzkiak identifikatu ditu

Aburtoren legatuari ez ezik, EH Bilduk agintean egiten duenari erreparatu dio EAJk Bilboko osoko bilkuran

Bizkaiko gasolindegien mahaian euskaraz negoziatzeari uko egitea egotzi die ELAk patronalari eta CCOOri

Santurtzin hildakoaren kontra taser pistola erabili zuten zoruan immobilizatuta zegoela

Zabalik da Durangoko Azokarako proposamenak bidaltzeko epea