Bilbaoren eta Egañaren bertsoak izan dira aurtengo onenak

Busturialdeko Hitza

Busturialdea

2013/04/24

Eguerdian banatu dituzte Bermeoko Udalaren Euskara sailak antolatzen duen bertso paper txapelketako sariak. Aurten, Kristina Bilbaok lehenengo mailan eta Oihane Egañak bigarren mailan egindako bertsoak izan dira txapelketako onenak. Bigarren postuan barriz, Eneko Torrerena eta Xabier Matillarena geratu dira, lehenengo eta bigarren mailan, hurrenez hurren.

Aurtengo parte hartzea iazkoa baino handiago izan da, guztira, 183 gaztek parte hartu baitute bertso paper lehiaketan. Urtero moduan, parte hartzea askoz be handiagoa izan da lehenengo mailan, hau da, 11 eta 14 urte bitarteko gazteak parte hartzen duten mailan; 177 lagunek aurkeztu baitute bertsoa. 15 eta 18 urte bitarteko gazteek osatzen duten bigarren mailan, aldiz, 6 lagunek aurkeztu dituzte bertsoak. Nestor Basterretxea aretoan egin dute sari banaketa ekitaldia. 1. mailako Kristina Bilbaoren bertso irabazlea. Ingelesa, frantsesa, eta gaztelera. Hainbat hizkuntza daude azaltzeko zera: Euskadiko altxorra da gure euskera, ez du ardura giputz edo bizkaiera. Baina euskara dago ohean sarturik ez dugu erabili, ta dago gaixorik. Laguna sendatzeko ez dago modurik euskaraz egitea baino errazagorik. Klasean ikasteko batua zailena, gero kalean ez da ahoskatzen dena. Horregatik esazu: “gaur da astelehena” esan beharrean hau: “hoy es lunes que pena!” 2. mailako Oihane Egañaren bertso irabazlea Aurtengo kurtsoari hasiera emanez denok arduratuta gure etorkizunez Aurten nota oso onak atera beharra hasi baino ez gara ta estututa jada Badoazkuz egunak da hasieran legez jarraitzen dogu denok ezer ez eginez Kurtso erdira helduta notak jaso behar hemen egoten dira barre eta negar Azkenengo esprinan sartu gara jada bakoitzaren onena emateko bada Irakasleek esan orain edo inoiz ala ere ikasle denok udaren zai gagoz