Halloween Metal Fest-a bosgarren urtera iritsi da
Spookypheria Productions kultur elkarteak antolatzen duen Halloween Metal Fest jaialdiak bost urte beteko ditu aurton eta aurrekoetan baino «indar gehiagorekin» agertuko da beldurra eta metala uztartzen dituen jaialdia. Beste behin be, Amerikako Estatu Batuetan (AEB) hain famatua den Halloween jaia ospatzeko aukera izango dute bermeotarrek; hori bai, hiru egun beranduago. Izan be, aurtengo Halloween Metal Fest jaialdia azaroaren 3an egingo dute, aurrekoetan legez, Bermeoko Kafe Antzokian. 20:30ean ateak ireki Antolatzaileek jakinarazi legez, 20:30ean irekiko dituzte Kafe Antzokiko ateak, eta goizaldea ondo sartu arte festa giroa nagusituko da Antzokian. Lehenik eta behin, jaialdi horretan ohikoa bihurtu den moduan, musika bideo emonaldiekin hasiko dira, videojukebox-ekin, hain zuzen be: «Bideo horiek taldeko kideon lagunak diren zenbaitek aurkezten dituzte». Gutxi gorabehera hamabi musika bideo ikusteko aukera egongo dela zehaztu dute. Horiek amaitu ostean, barriz, «jendeak gustuko izaten dituen toma faltsuak ipiniko ditugu; hau da, aurkezpenak grabatzen ditugunean sortzen diren irudiekin sortutakoak». Hiru talderen kontzertuak Musika bideo emonaldien ostean, kontzertuen txanda izango da. Hiru izango dira, hain zuzen be, Antzokiko agertoki gainean izango diren taldeak. Lehenengoak Bullets of Misery gernikarrak izango dira. MetalCore edo DeathCore tankerako soinuak lantzen dituzte, euskaraz abestuta. Horiek, gainera, Eskuak odolez busti abestiaren bideokliparen aurkezpena egingo dutela jakinarazi dute. Taldeak grabatu [...]
Spookypheria Productions kultur elkarteak antolatzen duen Halloween Metal Fest jaialdiak bost urte beteko ditu aurton eta aurrekoetan baino «indar gehiagorekin» agertuko da beldurra eta metala uztartzen dituen jaialdia.
Beste behin be, Amerikako Estatu Batuetan (AEB) hain famatua den Halloween jaia ospatzeko aukera izango dute bermeotarrek; hori bai, hiru egun beranduago. Izan be, aurtengo Halloween Metal Fest jaialdia azaroaren 3an egingo dute, aurrekoetan legez, Bermeoko Kafe Antzokian.
20:30ean ateak ireki
Antolatzaileek jakinarazi legez, 20:30ean irekiko dituzte Kafe Antzokiko ateak, eta goizaldea ondo sartu arte festa giroa nagusituko da Antzokian.
Lehenik eta behin, jaialdi horretan ohikoa bihurtu den moduan, musika bideo emonaldiekin hasiko dira, videojukebox-ekin, hain zuzen be: «Bideo horiek taldeko kideon lagunak diren zenbaitek aurkezten dituzte». Gutxi gorabehera hamabi musika bideo ikusteko aukera egongo dela zehaztu dute. Horiek amaitu ostean, barriz, «jendeak gustuko izaten dituen toma faltsuak ipiniko ditugu; hau da, aurkezpenak grabatzen ditugunean sortzen diren irudiekin sortutakoak».
Hiru talderen kontzertuak
Musika bideo emonaldien ostean, kontzertuen txanda izango da. Hiru izango dira, hain zuzen be, Antzokiko agertoki gainean izango diren taldeak. Lehenengoak Bullets of Misery gernikarrak izango dira. MetalCore edo DeathCore tankerako soinuak lantzen dituzte, euskaraz abestuta. Horiek, gainera, Eskuak odolez busti abestiaren bideokliparen aurkezpena egingo dutela jakinarazi dute. Taldeak grabatu duen lehenengo bideoklipa da eta Jon Mikeldi Oosterveen bermeotarrak zuzendu du.
Ondoren, 1995. urtetik elkarrekin dauden Bermeoko OST taldearen txanda izango da eta, azkenik, Vita Imana talde madrildarrak hartuko du agertokia. Horiek Hardcore eta Groove Metal amerikarra Afrikako eta Asiako tribuetako erroa duten soinuekin nahasten dituzte. Nazioarteko hainbat jaialditan parte hartu duen taldea da.
Mozorrotua joateko eskaera
Spookypheria Productions elkarteak jendeari mozorrotuta hurbiltzeko deia egiten die, Halloween jaian ahalik eta gehien girotu ahal izateko. Gainera, hiru mozorrorik onenentzako sariak egongo direla zehaztu dute.
Sarrerak salgai daude jada. Aurretiaz erosita 6 euro balio dituzte eta honako lekuetan eros daitezke: Bermeon, Luma liburudendan, Katu tabernan, Zarata musika dendan eta Kafe Antzokian; eta Gernika-Lumon Ospa tabernan. Bestalde, egun berean leihatilan erosten dutenek 9 euro ordaindu beharko dituzte.
HITZA egunkariak Halloween Metal Fest jaialdira doan joateko aukera emongo die lau laguni; izan be, harpidedunen artean bi lagunentzako bina sarrera zozkatuko ditu datorren astean.
