Greba deialdiagaz bat egiteko eta kalera irteteko eskatu du ELAk
Gotzon Basaraz, Nere Urrestarazu eta Lourdes Ansotegi Busturialdeko ELAren ordezkariek egueneko “greba deialdiagaz bat egiteko, eta mobilizazioetan parte hartzeko” eskatu dute, gaur eguerdian egindako agerraldi baten. “Zapaterok hasi eta Raxoik amaitu” duen murrizketa prozesu etengabea azken hamarkadetako atzerapauso handiena dela iritzita, langileriaren oihua “kalera” ateratzeko deialdia egin dute. Hala, goizean Bilbon egingo diren mobilizazioetara joateko, eta arratsaldean Gernika-Lumoko eskualde mailako manifestazioan parte hartzeko eskatu dute. Eskualdeko sindikatuek eta eragile sozialek deitu duten manifestazioa 18:30ean hasiko da, Merkurio Iturriaren ondotik. Urrestarazuk azaldu duenez, “greba eguna ez da etxean geratzeko, langileak bat eginik daudela erakusteko eguna da”. ELAren ordezkariaren ustez, urteetan zehar lan baldintzetan emon diren “aurrerapausoak bertan behera” geratu daitezke lan erreforma barriagaz. Izan be, lan erreforma egietaz gain, Alderdi Popularrak “negoziazio kolektiboaren erreforma” egitea ahalbidetuko du. ELAko ordezkariak baikor azaldu dira greba egunak izango duen harreraz berba egitean. Urrestarazuk, esaterako, grebak “harrera oso ona” izango duela esan du. “Herritarrak greba egiteko arrazoiekin bat datoz, eta kalera irtengo direla deritzogu” dio. Basarazek nabarmendu duenez, gainera, “kalean indarra egin ezean, lan erreformak aurrera egitea errazagoa izango da”. Hala, “basakeriaren aurrean” eskualdeko herritar guztiak mobilizatzea eskatu du. Beldurra berba be, ELAren ordekarien ahotan egon da. Urrestarazuk argitu duenez, “zenbait langileek greba ez egitearen [...]
Gotzon Basaraz, Nere Urrestarazu eta Lourdes Ansotegi Busturialdeko ELAren ordezkariek egueneko “greba deialdiagaz bat egiteko, eta mobilizazioetan parte hartzeko” eskatu dute, gaur eguerdian egindako agerraldi baten. “Zapaterok hasi eta Raxoik amaitu” duen murrizketa prozesu etengabea azken hamarkadetako atzerapauso handiena dela iritzita, langileriaren oihua “kalera” ateratzeko deialdia egin dute. Hala, goizean Bilbon egingo diren mobilizazioetara joateko, eta arratsaldean Gernika-Lumoko eskualde mailako manifestazioan parte hartzeko eskatu dute. Eskualdeko sindikatuek eta eragile sozialek deitu duten manifestazioa 18:30ean hasiko da, Merkurio Iturriaren ondotik.
Urrestarazuk azaldu duenez, “greba eguna ez da etxean geratzeko, langileak bat eginik daudela erakusteko eguna da”. ELAren ordezkariaren ustez, urteetan zehar lan baldintzetan emon diren “aurrerapausoak bertan behera” geratu daitezke lan erreforma barriagaz. Izan be, lan erreforma egietaz gain, Alderdi Popularrak “negoziazio kolektiboaren erreforma” egitea ahalbidetuko du.
ELAko ordezkariak baikor azaldu dira greba egunak izango duen harreraz berba egitean. Urrestarazuk, esaterako, grebak “harrera oso ona” izango duela esan du. “Herritarrak greba egiteko arrazoiekin bat datoz, eta kalera irtengo direla deritzogu” dio. Basarazek nabarmendu duenez, gainera, “kalean indarra egin ezean, lan erreformak aurrera egitea errazagoa izango da”. Hala, “basakeriaren aurrean” eskualdeko herritar guztiak mobilizatzea eskatu du.
Beldurra berba be, ELAren ordekarien ahotan egon da. Urrestarazuk argitu duenez, “zenbait langileek greba ez egitearen arrazoia beldurra izango da”. Dioenez, “kontratu oso prekarioak” dituztenei, esaterako, greba egiteko eskubidea ukatzen zaie. Urrestarazuren ustez, erreformaren helburuetako bat “beldurraren bitartez langileak irmo jartzea da, eta horren aurrean, kalera irtetzea da aukera bakarra.
