Datorren eguenean sarituko dute Bermeoko erakusleihorik onena

Bermeoko Hitza

Busturialdea

2010/12/23

Berton Bermeoko Txiki-Erdi enpresen elkarteak datorren eguenean jakinaraziko du zein den aurtengo gabonetako herriko erakusleihorik onena. Horretarako, urtero legez, jaialdi txiki bat antolatu du. Nestor Basterretxea aretoan izango da, eguenean, 20:30ean. Clownclusiones Oihulari Klown taldea izango da aurtengo sari banaketa ekitaldiaren giroa alaitzen eta bertaratutako guztientzako luntxa ere izango da.

Bertonek txapelketa hori antolatzen duen bederatzigarren urtea da eta 31 dira aurten txapelketan parte hartzen ari diren Bermeoko dendak.

Hamabi sari

Urtero bezala, ondoen apainduta dagoen erakusleihoa sarituko dute. Hamabi izango dira, hain zuzen be, banatuko dituzten sariak. Epaimahaikideei erakusleihoen apainketa baloratzeko irizpide artistikoak, teknikoak eta merkataritzakoak hartuko dituzte kontuan. Proiektuak sormenezkoak eta berritzaileak izan behar dira. Eta ez hori bakarrik, komertzio bakoitzaren produktua indartu beharko dute.

Iaz, Elezgarai instalazioentzako izan zen txapelketako lehenengo saria. Bigarren eta hirugarren sariak Luma liburudendarentzat eta Mararterentzat izan ziren, hurrenez hurren.