Hemeretzi milioi euroko aurrekontua aurkeztu du Bermeoko Udalak
Bermeoko Udalak 2011rako aurrekontuak aurkeztu ditu, 19.018.762,12 eurokoa. Datorren urtean, beraz, aurten baino diru gutxiago izango du Udalak; %1,6 gutxiago, hain zuzen. «Aurtengoekin jarraituz, aurrekontu gogorrak izango dira beste behin ere», azaldu du Bermeoko alkate Xabier Legarretak.
Bermeoko Udalak 2011rako aurrekontuak aurkeztu ditu, 19.018.762,12 eurokoa. Datorren urtean, beraz, aurten baino diru gutxiago izango du Udalak; %1,6 gutxiago, hain zuzen. «Aurtengoekin jarraituz, aurrekontu gogorrak izango dira beste behin ere», azaldu du Bermeoko alkate Xabier Legarretak.
Aurrekontuak zehazterakoan bi helburu izan dituzte, alkatearen esanetan. Alde batetik, gastuen kontrol «zehatza» egingo dute. Bestetik, orain arteko zerbitzu guztiak mantendu gura izan dituzte; batez ere, gastu sozialei dagokien atalari. Horrela, Gizarte Ongizaterako Udal Patronatuak aurten jasotakoaren antzeko kopurua hartuko du: 5.075.457 euro, hain zuzen ere.
Kirol Patronatua izango da diru gehien hartuko duen sailetako bat. 1.259.100 euro bertara bideratuko dituzte, eta ia dena inbertsioak egiteko izango da.
AURREIKUSITAKO INBERTSIOAK
- Nestor Basterretxea aretoko eserlekuak aldatzeko: 30.000 euro. Aspaldidanik duten eskaera bat dela esan du Legarretak, «erosoak ez direlako».
- Argi publikoetarako inbertsioak: 50.000 euro.
- Jolasgune berri bi egiteko: 130.000 euro. Eskaera handia egoten delako. Ziurrenik, inauguratu berri den Artike enparantzan ipiniko dute bat, eta bestea Kurtzio kalean, igogailu parean dagoen plazatxoan.
- Herri barruko kale eta guneen berriztapenarako. 425.000 euro.
- Kontserben museoaren lanak egiteko: 100.000 euro. Ormaza fabrika izandakoan kontserbaren museoa egiteko lanak hastea aurreikusita dago. Lehenengo faseko lanak izango litzateke. Jaurlaritzara ere diru-laguntzak eskatu dituztela azaldu du alkateak.
- Auzoetako bideetan konponketak egiteko: 150.000 euro.
- Bermibusa: 100.000 euro. Aurton martxan ipini duten zerbitzuak datu onak izan dituela kontuan izanik, asmoa zerbitzua handitzea da.
- Kiroldegiko inbertsioak; 245.000 euro. Larrialdietarako eskailerak egiteko bideratuko dute zatirik handiena eta bestea material berria erosteko.
